Varshavada Qazaqstan men Polsha syrtqy ister mınıstrlikteri ózara árekettestik máselelerin talqylady

ASTANA. QazAqparat - Polsha Respýblıkasynyń Prezıdenti Andjeı Dýdanyń 6-8 qyrkúıekte Astana qalasyna memlekettik sapary barysynda Qazaqstan men Polsha memleketteriniń basshylary qol jetkizgen ýaǵdalastyqtarǵa sáıkes, 13 qyrkúıekte Varshavada BUU Qaýipsizdik Keńesiniń sheńberinde eki el arasyndaǵy ózara árekettestik boıynsha syrtqy ister mınıstrlikteri arasynda konsýltatsııalar ótkizildi.

 Qazaqstandyq delegatsııany QR Syrtqy ister mınıstriniń orynbasary Erjan Ashyqbaev, al polıak delegatsııasyn PR Syrtqy ister mınıstriniń orynbasary Ioana Vronetska basqardy.

Kezdesý barysynda qazaqstandyq dıplomat polıak áriptesterin BUU Qaýipsizdik Keńesinde Qazaqstannyń basymdyqtary týraly habardar etip, 2018 jylǵy qańtardaǵy tóraǵalyq etý kezeńindegi Qazaqstan Respýblıkasynyń josparlarymen bólisti, dep habarlaıdy QR SІM baspasóz qyzmeti.

Óz kezeginde I.Vronetska BUU-nyń negizgi organynda elimizdiń tájirıbesin qabyldaýdaǵy qyzyǵýshylyǵyn bildirip, 2018-2019 jyldary BUU Qaýipsizdik Keńesiniń turaqty emes músheligi kezeńinde Polshanyń basymdyqtarymen tanysty.

Suhbat barysynda taraptar Qazaqstan men Polsha arasyndaǵy kópjaqty sanatyndaǵy yntymaqtastyq máseleleri boıynsha, halyqaralyq kún tártibindegi ózekti máseleler, sonyń ishinde Taıaý Shyǵys, Afrıka, Aýǵanstan, Ýkraınadaǵy jaǵdaı, sondaı-aq ıadrolyq qarýlardy taratpaý, BUU reformasy, qaqtyǵystardy boldyrmaý jáne t.b. ózekti máseleler boıynsha pikir almasty.

Budan ózge, QR SІM delegatsııasynyń sapary barysynda Polsha Respýblıkasynyń Qaýipsizdik Keńesiniń hatshysy Pavel Solohpen kezdesý ótti. Júzdesý barysynda BUU Qaýipsizdik Keńesiniń kún tártibindegi eki eldiń arasyndaǵy odan ári tyǵyz yntymaqtastyqtyń máseleleri talqylandy.