Van Gogtyń beımálim avtoportreti tabyldy

NUR-SULTAN. QazAqparat – Ǵalymdar Van Gogtyń buryn belgisiz bolǵan avtoportretin tapty. Ol sýretshiniń Shotlandııadaǵy ulttyq galereıasynda saqtaýly turǵan «Aq qalpaqtaǵy sharýa áıel portreti» atty áıgili kartınasynyń artyna qystyrylyp qalǵan eken. Bul týraly QazAqparat BBC aqparat agenttigine silteme jasap habarlaıdy.

Shotlandııa ulttyq galereıasy (Shotlandııadaǵy úsh ulttyq galereıany jáne eki seriktes galereıany baqylaıtyn vedomstvolyq emes uıym) ókilderiniń aıtýynsha, keremet olja kezdeısoq tabylǵan.

Edınbýrgtegi Koroldik Shotlandııa akademııasynda ımpressıonısterge arnalǵan kórmeniń ashylý qarsańynda kýratorlar Van Gogtyń 1885 jylǵy jumysyn rentgenge túsirýdi uıǵarady.

Sol kezde kartınanyń artqy jaǵynda birneshe jelimmen jaǵylǵan jáne kartonmen jabylǵan sýret tabylady, bul sýretshiniń avtoportreti bolýy ábden múmkin. Sýret-kartınany 20 ǵasyrdyń basynda ótken kórmege daıyndaý kezinde jabystyrylýy múmkin.

Van Gog jıi aqsha únemdeý úshin kenepterin eki jaǵynan paıdalanýǵa májbúr bolǵan. Tabylǵan portrette jıegi bar qalpaq kıgen jáne moıynǵa oramal baılap otyrǵan saqaldy adam beınelengen. Kartınada onyń sol jaq qulaǵy anyq kórinip tur: Van Gog «Aq qalpaqtaǵy sharýa áıel portretin» jazǵannan keıin úsh jyldan soń ashýǵa berilip, sol qulaǵyn palıtra pyshaǵymen kesip tastaǵan.

Bul onyń avtoportret salýdaǵy alǵashqy áreketteriniń biri bolsa kerek. Keıinirek jumystary jaqsara bastap, búginde Van Gogtyń keıingi avtoportretteri shedevr bolyp sanalady.

Foto: bbc.com