Valıýta naryǵynda qubylmalylyq saqtalýda - QR Ulttyq bank tóraǵasy

ASTANA. QazAqparat - Ulttyq valıýtanyń orta merzimdi perspektıvadaǵy baǵamyn anyqtaıtyn jaǵymdy fýndamentaldy faktorlarǵa qaramastan valıýta naryǵynda qubylmalylyq saqtalýda. Bul týraly QR Ulttyq bankiniń tóraǵasy Danııar Aqyshev baspasóz jáne televızııalyq BAQ redaktorlarymen kezdesýi barysynda aıtty.

«Devalvatsııa bolýy múmkin degen boljamdardyń yqpalymen shetel valıýtasyna degen suranys artyp, dollardyń baǵamy 14 qyrkúıektegi jaǵdaı boıynsha 337 teńgege teń boldy, ıaǵnı teńge 0,3 protsentke arzandady. Jyl basynan beri tól valıýtamyz 1,4 protsentke álsiredi», dedi D.Aqyshev.

Onyń sózinshe, Ulttyq bank shetel valıýtasyna degen usynystyń azdyǵynan tamyz ben qyrkúıekte onyń satýshysy boldy. Tamyzda Ulttyq banktiń netto-ınterventsııalar aýqymy 70 mln. AQSh dollaryna teń boldy.

«Ulttyq banktiń boljamdary boıynsha, eger munaı baǵasy barreline 50 AQSh dollarynan kem bolmasa, al, Reseı rýbliniń quny bir dollarǵa shaqqanda 59-60-tan asyp túspese teńgeniń AQSh dollaryna degen baǵamy osy deńgeıde saqtalady»,-dedi D.Aqyshev.

Sonymen qatar, Ulttyq bank tóraǵasy eldiń altyn valıýta qorynyń ósimi týraly aıtty.

«Aldyn ala málimetter boıynsha, eldiń altyn valıýta qorynyń ósimi 11,6 protsentke nemese 32,9 mlrd dollarǵa kóbeıgen. Eldiń halyqaralyq rezervteriniń jalpy quny 2017 jyldyń tamyzynda, Ulttyq qordyń aktıvterin qosa alǵanda, 58 mlrd dollarǵa artyp, 91 mlrd dollarǵa jetken. Bul ІJÓ-niń 61 protsenti».