Valensııada Abaıdyń 175 jyldyǵyna arnalǵan is-sharalar ótti

NUR-SULTAN. QazAqparat – Valensııanyń ortalyq kitaphanasynda jáne osy Ispanııa avtonomııasynyń astanasynda ornalasqan «Jibek mýzeıinde» Abaı Qunanbaıulynyń 175 jyldyǵyna arnalǵan is-sharalar ótti, dep habarlaıdy QR SІM baspasóz qyzmeti.

Ispan tiline aýdarylǵan «Qara sózderi» kitabyn jáne Prezıdent Qasym-Jomart Toqaevtyń «Abaı jáne HHІ ǵasyrdaǵy Qazaqstan» kitapshasyn tanystyra otyryp, Qazaqstan Elshisi Konstantın Jıgalov tyńdaýshylarǵa elimizdiń ómirindegi Abaı shyǵarmashylyǵy men jeke tulǵanyń mádenı-rýhanı damýdaǵy róli, aqynnyń murasyn ilgeriletýge arnalǵan ıÝNESKO qoldaýymen ótken aýqymdy is-sharalar týraly aqparat berdi.

XVIII ǵasyrda qurylǵan Ispanııadaǵy eń iri kitaphanalarynyń biriniń qoryna ıspan tilinde jaryq kórgen basylymdar, onyń ishinde Tuńǵysh Prezıdent – Elbasy Nursultan Nazarbaevtyń «Táýelsizdik dáýiri», «Qazaqstandyq jol», «Álem epıtsentri» kitaptary, «Uly dalanyń jeti qyry» maqalasy, Prezıdent Q. Toqaevtyń «Jańa jaǵdaıdaǵy Qazaqstan: is-qımyl kezeńi» atty joldaýy, qazaq poezııasy men prozasynyń antologııalyq jınaqtary jáne Otanymyzdyń ejelgi jáne jańa tarıhyna arnalǵan shyǵarmalar usynyldy.

Dıplomat Elbasy «qazaqstandyq joldy» qamtamasyz etýge jáne elimizdiń damyǵan memleketke aınalýyna qosqan orasan zor úlesine, bitimgershi jáne saıasatker retindegi qyzmetine toqtalyp, onyń aýqymdy bastamalary álemdik qaýipsizdikti qurýǵa kópshilik moıyndaǵan úles qosqanyn atap ótti.

Óz kezeginde ıspan tarapy Servantes tilindegi Qazaqstan týraly kitaptardy Valensııa kitaphanasyna berý alǵashqy ret júzege asyrylyp jatqanyn basa aıtty. Alynǵan basylymdar ıspan oqyrmandarynyń Qazaqstan týraly bilimderin keńeıtýge yqpal etetini sózsiz.

«Jibek mýzeıinde» ótken is-sharada sóz sóılegen ıÝNESKO-nyń Jibek Joly halyqaralyq jelisiniń prezıdenti, bedeldi ıspandyq saıasatker Hose Marııa Chıkııo Barber «ıÝNESKO qoldaýymen Abaıdyń 175 jyldyǵyn atap ótý – bul qazaq aqynynyń tarıhı murasynyń mańyzdylyǵyn búkil álemde moıyndaý» dep atap ótti.

Muraǵattar, kitaptar, eskızder kollektsııasy men ǵasyrlar boıy jasalǵan jibek buıymdarynyń úlgileri bar mýzeıge kelýshiler budan bylaı Jibek jolynyń negizgi baǵdarlaryna engen Saıram, ıAssy, Otyrar, Taraz sııaqty qalalardyń jeri Qazaqstan tarıhy týraly kitaptarmen tanysa alady.