Vakıl Nabıev: Jastar máselesi - memleket saıasatynyń basty baǵyty

ALMATY. QazAqparat - Jastar máselesi memlekettik saıasattyń basym baǵytyna aınalǵany qýantady. Osyndaı oıymen QazAqparat tilshisine Almaty qalalyq Kúrd mádenı ortalyǵynyń basshysy Vakıl Nabıev bólisti.

«2019 jyldy Jastar jyly dep jarııalaý - jastar máselesiniń memleket múddesiniń tasasynda qalyp qoımaı, basty baǵyttardyń birine aınalǵany qýantady. Bul tek jastardyń ál-aýqatyn jaqsartý ǵana emes, sondaı-aq rýhanı qundylyqtaryn qalyptastyrý bolyp tabylady. Qazirgi tańda búkil álemde jastardy jumyspen qamtý máselesi daǵdarys aldynda turǵany anyq. Osy oraıda Qazaqstan óz jastarynyń aldyńǵy ómirine alańdaýshylyq bildirip, memlekettik saıasattyń basym baǵyty retinde qolǵa alýy óte durys shara dep oılaımyn. Qazaqstan aldaǵy bolashaqqa jospar qurǵan kezde mindetti túrde jastardyń máselesin eskeretini anyq», - dedi Vakıl Nabıev.

Onyń aıtýynsha, Qazaqstanda jastardyń bilim alyp, ózge eldegi qurdastarymen básekege túsýi úshin barlyq jaǵdaı jasalǵan.

«Memleket aldynda jastar atqaratyn mindetter de bar. Ol salaýatty ómir saltyn ustaný, bilim alý, ózge jastarmen básekege qabiletti bolý. Odan bólek, memleket jastardyń jumyspen qamtý, bilim berý, baspanamen qamtamasyz etý boıynsha kóptegen keleli máselelerin sheshýi tıis», - dedi ortalyq basshysy.

Eske salaıyq, búgin Astanada Prezıdenttiń qatysýymen Jastar jylynyń saltanatty ashylý rásimi ótti. Oǵan Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler qatysty.

Nursultan Nazarbaev 2019 jyldy Jastar jyly dep jarııalaýdy byltyrǵy 5 qazanda Qazaqstan halqyna kezekti Joldaýynda usynǵan edi.

Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn. Bir aıdan astam ýaqyt ótkennen keıin Elbasy Jarlyǵymen 2019 jyl resmı túrde Jastar jyly dep jarııalandy.