Vaktsınalaý jumystarynan naýqanshyldyq jasamaý kerek – Prezıdent

NUR-SULTAN. QazAqparat – Memleket basshysy Qasym-Jomart Toqaev halyqty vaktsınalaý protsesinen naýqanshyldyq jasamaýǵa shaqyrdy, dep habarlaıdy QazAqparat tilshisi.

«Koronavırýspen kúrestegi túbegeıli basqa tásilder medıtsınalyq aspektilerge ǵana emes, bıznesti shekteý sharalaryna da qatysty. Alda monıtorıngtik toptar jumysyn qaıta formattaý men Ashyq júıesi sııaqty tsıfrlyq sheshimderdi belsendirek paıdalaný jumystary tur. Shaǵyn jáne orta bıznes qyzmetkerlerin vaktsınalaý merzimderi naqty ári naýqanshyldyqtan ada bolýy tıis», - dedi Qasym-Jomart Toqaev.

Sonymen birge, Prezıdent Ashyq júıesin paıdalanatyn shaǵyn jáne orta bıznes sýbektilerine basymdyq berýdi eske saldy.

«Vedomstvoaralyq komıssııadan osy máseleni taǵy da muqııat zerdeleýdi suraımyn. Ashyq júıesin paıdalanatyn shaǵyn jáne orta bıznes sýbektileriniń karantındik shekteýler jaǵdaıynda jumys isteýge basym quqyǵy bolýy kerek. Bul rette qosymshanyń naqty qoldanylýyn qatań baqylaý kerek», - dedi Memleket basshysy.

Buǵan deıin Prezıdent antıvakserlerdiń qaýeset, dańǵaza áńgimelerine senýdiń qajeti joq degen edi.