Vaktsınalaý orazany buzbaıdy – Ózbekstan musylmandary basqarmasy

TAShKENT. QazAqparat – COVID-19 koronavırýsyna qarsy vaktsınalaý musylmandar úshin qasıetti Ramazan aıynda orazany buzbaıdy. Tıisti túsinikteme Ózbekstan musylmandary basqarmasynyń saıtynda jarııalandy, dep habarlaıdy QazAqparat.

«Ramazan – musylmandar úshin qadirli aı, onda kúni boıy oraza ustaý talap etiledi – kún batqansha tamaq, alkogol, temeki shegýden, kóńil kóterýden aýlaq bolý kerek. Aı kúntizbesi boıynsha orazanyń bastalýy bıyl 13 sáýirge keledi. Pátýalarǵa sáıkes, koronavırýsqa qarsy vaktsınany oraza kezinde de alýǵa bolady, óıtkeni bul orazany buzbaıdy», - delingen Ózbekstan musylmandary basqarmasynyń málimdemesinde.

Dinı basqarmanyń baspasóz qyzmeti atap ótkendeı, koronavırýsqa qarsy ekpe – qorektik zat bolyp sanalmaıdy jáne teri asty men bulshyqetke salynady.

Eske sala keteıik, Ózbekstanda koronavırýsqa qarsy jappaı vaktsınalaý 1 sáýirde bastaldy. Halyqty vaktsınamen qamtý birtindep keńeıedi: sáýirde - iri qalalarda, mamyrda – aýdan ortalyqtary men shaǵyn qalalarda, al maýsymda – aýyldyq jerlerde jalǵasady. Jalpy, Ózbekstanda úsh aıda 4 mıllıonnan astam adamǵa ekpe egý josparlanǵan.