Vaktsınatsııanyń ósýi iskerlik belsendilikti arttyrdy – Ulttyq bank

NUR-SULTAN. QazAqparat –Elimizde jáne jalpy álem boıynsha vaktsınatsııanyń qarqyn alýy el ekonomıkasynyń ósimine oń áser ete bastaǵan. Osyny eskergen Eýropa qaıta qurý jáne damý banki de Qazaqstannyń jalpy ishki óniminiń ósýi jónindegi boljamyn jaqsartqan, dep habarlaıdy QazAqparat tilshisi.

Bul týraly Ulttyq bank tóraǵasy Erbolat Dosaev Úkimettiń keńeıtilgen otyrysynda aıtty.

«Vaktsınatsııanyń ósýi jáne syrtqy konıýnktýranyń jaqsarýy arqasynda álemde jáne Qazaqstanda iskerlik belsendilik qalpyna kelýde. Sonyń arqasynda Global PMI ındeksi qyzmet kórsetý, óndiris jáne jańa qyzmetkerlerdi jaldaý salalarynyń ósýi esebinen 15 jyldyq eń joǵary kórsetkishke deıin kóterildi. Óz kezeginde, Qazaqstanda iskerlik belsendilik ındeksi osy jylǵy maýsymda ekonomıkanyń barlyq sektorlarynyń qalpyna kelýi esebinen 51,6 bolyp, 2019 jylǵy mamyrdan bastap eń joǵary kórsetkishke jetti», - dedi Ulttyq bank basshysy.

Erbolat Dosaev el ekonomıkasynyń ósý boljamy jaqsarǵanymen, epıdemıologııalyq ahýal ony kez kelgen ýaqytta ózgertip jiberýi múmkin ekenin eskertti.

«Syrtqy jáne ishki naryqtardaǵy oń ózgeristerdi eskere otyryp, Ulttyq bank bıylǵy jylǵy maýsymnyń basynda 2021 jylǵy Qazaqstan ekonomıkasynyń ósý boljamyn 3,6-3,9%-ke deıin kóterdi. Osydan keıin Eýropa qaıta qurý jáne damý banki Qazaqstan ekonomıkasynyń ósý boljamyn da 3,0%-ten 3,6%-ke deıin jaqsartty.

Álemdik jáne ulttyq ekonomıkany odan ári qalpyna keltirý úshin koronavırýstyń jańa shtamdarynyń taralýyna baılanysty karantın shekteýlerin yqtımal kúsheıtý negizgi táýekelge aınaldy», - dedi Ulttyq bank tóraǵasy.