Vaktsınatsııadan balalar ólimi rekordtyq kórsetkishterge jetti - feık

NUR-SULTAN. QazAqparat - Áleýmettik jeliler men messendjerlerde balalar ólimi COVID-19-ǵa qarsy egý naýqanynyń bastalýymen rekordtyq deńgeıge jetti degen aqparat taratylýda. Bul týraly sońǵy jeti aıda satqan tabyttyń sany bes jyldaǵy kórsetkishke teń dep aıtqan AQSh tabytshy málimdegen eken. Bul feık, dep habarlaıdy QazAqparat stopfake.kz saıtyna silteme jasap.

Balalarǵa arnalǵan tabyttarǵa jappaı tapsyrys berý týraly sóz alǵash ret jalǵan aqparattyń rýpory bolyp tabylatyn jáne únemi COVID-19 pandemııasyndaǵy vaktsınatsııa týraly feıkter taratatyn áıgili Stıý Pıters shoýynyń efırinde aıtyldy.

Balalar óliminiń artýy týraly oqıǵa Jelide vırýstyq sıpatqa ıe bolǵannan keıin, ony Lead Stories portalynyń faktchekerleri joqqa shyǵardy. Olardyń maqalasynda AQSh-ta COVID-19 qarsy vaktsınatsııaǵa baılanysty balalar óliminiń birde-bir jaǵdaıy tirkelmegeni aıtylǵan. Biraq, AQSh aýrýlardy baqylaý jáne aldyn alý ortalyǵynyń esebine sáıkes, osy jyldyń 15 shildesindegi jaǵdaı boıynsha elde 1 694 bala COVID-19-dan qaıtys bolǵan. Bul ólimniń kóp bóligi balalar men jasóspirimderge arnalǵan KVI qarsy vaktsınalar maquldanǵanǵa deıin bolǵanyn atap ótken jón.
Amerıkalyq tabyttar men jerleý jabdyqtary qaýymdastyǵynyń portalynda elde balalarǵa arnalǵan tabyttarǵa degen suranys kúrt ósti degen teorııany rastaıtyn derekter joq. Qaýymdastyq ókilderi de Lead Stories portalyna jaqynda balalar óliminiń kúrt óskeni týraly málimdemelerdi rastaıtyn statıstıka joq ekenin aıtqan.
Balalarǵa arnalǵan tabyttarǵa suranystyń artqany týraly teorııamen birge barlyq COVID-19 qarsy vaktsınalardyń quramy birdeı jáne ómirge qaýipti degen tujyrym aıtylǵan. Bul olaı emes. Ár túrli kompanııalar shyǵarǵan KVI qarsy vaktsınalar bir-birinen erekshelenedi. Buǵan QR DSM Medıtsınalyq jáne farmatsevtıkalyq baqylaý komıtetiniń resmı saıtynda jarııalanǵan preparattardyń quramymen tanysyp, ońaı kóz jetkizýge bolady. Sondaı-aq, jarııalanǵan málimetterden vaktsınalardyń quramynda qaýipti komponentter joq ekenin bilemiz.
COVID-19 qarsy vaktsınalardyń qaýipsizdigi zerthanalyq jáne klınıkalyq zertteýlermen rastalǵan.
Demek, taralǵan habarlama – feık.