Vaktsınatsııa: Qazaqstan TMD elderiniń arasynda kósh bastap tur

NUR-SULTAN. QazAqparat – Qazaqstan halyqty COVID-19-ǵa qarsy vaktsınalaý kórsetkishi boıynsha TMD elderiniń arasnyda kósh bastap tur, dep habarlaıdy QazAqparat tilshisi.

Úkimet otyrysynda QR Densaýlyq saqtaý mınıstri Alekseı Tsoı osyndaı derek keltirdi.

«Búgingi tańda qyzyl aımaqta 2 óńir (Pavlodar jáne Soltústik Qazaqstan oblystary) qaldy.

5 óńir – sary aımaqta (Qaraǵandy, Qostanaı, Aqmola, Atyraý jáne Nur-Sultan qalasy).

Qazaqstan Respýblıkasy jáne qalǵan 10 óńir jasyl aımaqta ornalasqan. Aýrýshańdyqtyń reprodýktıvtilik sany - 0,96», - degen vedomstvo basshysy elimizde keıingi eki aıda syrqattaný 3,8 ese, al ólim-jitim 2,4 ese tómendegenin atady.

Aıtýynsha, 1 tamyzdan beri respýblıka kóleminde ınfektsııalyq tósekterdiń júktelimi 56-dan 30%-ǵa deıin, reanımatsııalyq tósekterdiń 45-ten 27%-ǵa deıin tómendegen. Em alýshylar sany boıynsha da oń dınamıka bar. Sońǵy úsh aıda naýqastar sany 2,6 ese – 90 767-den 34 068 naýqasqa deıin azaıǵan.

«Halyqty KVI-ǵa qarsy vaktsınatsııalaý jalǵasýda. Birinshi komponentpen 8,5 mıllıonnan astam adam ekpe aldy. Bul tıisti eresek halyqtyń 75,1%- nemese jalpy halyqtyń 45,3%-y degen sóz. Ekinshi komponentti 7,8 mln adam, ıaǵnı tıisti halyqtyń 68,8%-y nemese jalpy halyqtyń 41,5%-y qabyldady.

Koronavırýs ınfektsııasyna qarsy vaktsınalaý júrgiziletin 207 eldiń álemdik reıtıngi sinde Qazaqstan halyqty KVI-ge qarsy eki dozamen qamtý boıynsha 104-orynda. TMD elderi arasynda Qazaqstan bul kórsetkish boıynsha kósh bastap tur», - dedi Alekseı Tsoı.