Vaktsınatsııa arqyly adamdardyń ómirin saqtap qala alamyz – armıan sarapshysy

EREVAN.QazAqparat – Armenııada koronavırýstyń úshinshi tolqyny órship tur. Infektsııanyń taralýyn boldyrmaý jáne adamdardyń ómirin saqtaý turǵysynan vaktsınatsııa mańyzdy ról atqarady.

Bul týraly Armenııa Densaýlyq saqtaý mınıstrliginiń Aýrýlardy baqylaý jáne aldyn alý ulttyq ortalyǵy dırektorynyń orynbasary Gaıane Saakıan málimdedi, dep habarlaıdy «QazAqparat» HAA menshikti tilshisi.

Armenııada koronavırýs ınfektsııasynyń taralý ósimi baıqalady. Qazirgi ýaqytta 20-dan astam medıtsınalyq ortalyq COVID-19 vırýsyn juqtyrǵan patsıentterge qyzmet kórsetýge baǵyttalǵan. Búgingi tańda ınfektsııanyń kóbeıý qarqyny 1,2 quraıdy. Armenııada ınfektsııa taralýynyń úshinshi tolqyny óziniń sharyqtaý shegine jetti.

Sarapshynyń aıtýynsha, ınfektsııanyń taralýyna qarsy turý úshin áleýmettik qashyqtyq, maska taǵý jáne qoldy dezınfektsııalaý sekildi qaýipsizdik erejelerin saqtaý kerek.

«Qazir bul erejelerge vaktsınatsııa qosyldy. Ol aýrýmen kúreste mańyzdy ról atqarady. Búkil álemde jaǵdaıdy vaktsınatsııa arqyly turaqtandyrýǵa bolady degen úmit bar», - dedi G.Saakıan.

Sarapshynyń aıtýynsha, elde ınfektsııanyń taralý qarqynyn eskere otyryp, Armenııada qaýip tobyna kiretin azamattar úshin vaktsınany múmkindiginshe tez satyp alý óte mańyzdy boldy.

«Vaktsınatsııa arqyly biz, eń aldymen, COVID-19 vırýsynan bolatyn ólim jaǵdaılarynyń aldyn alýǵa tyrysýymyz kerek. Vaktsınanyń barlyq túrleri osyndaı múmkindik beredi. ıAǵnı, vaktsınatsııa adamnyń koronavırýsty juqtyrmaıtyndyǵyna 100% kepildik emes. Alaıda, vaktsınatsııa aýyrmaýǵa múmkindik beredi ıa bolmasa eger adam aýyryp qalsa, aýrýhanaǵa jatpaı-aq aýrýdy ońaı eńserýge múmkindik beredi. Vaktsınatsııa – adamdardyń ómirin saqtap qalýdyń 100 paıyz kepili» - dep atap ótti sarapshy.

Onyń aıtýynsha, qaýip tobyndaǵy azamttardy jappaı vaktsınalaýdy Erevanda 7-8 sáýirde, oblystarda - sál keıinirek bastaý josparlanyp otyr. Alaıda, vaktsınatsııa protsesi múmkindiginshe tezirek bastalýy úshin qoldan kelgenniń bári jasalýda.

Eske sala keteıik, Armenııada COVID-19-ǵa qarsy vaktsına erikti túrde salynady. Buǵan deıin Armenııaǵa «Spýtnık V» vaktsınasynyń synama partııasy jetkizilgen bolatyn, qaýip tobyndaǵy 600-ge jýyq adamǵa ekpe salyndy. 28 naýryzda Astra Zeneca vaktsınasynyń alǵashqy partııasy (24 myń doza) Armenııaǵa jetkizildi.

Azamat Álmaǵambetov

Basty foto: armenpress.am