Vaktsına salǵan balalarda mártebe bola ma - Jandarbek Bekshınniń jaýaby

ALMATY. QazAqparat - Vaktsına salǵan balalarda «jasyl, kók, qyzyl» mártebesi bola ma? Bul saýalǵa brıfıng barysynda Jandarbek Bekshın jaýap berdi, dep habarlaıdy QazAqparat tilshisi.

Almaty qalasynyń sanıtarııalyq-epıdemıologııalyq baqylaý departamentiniń basshysy, qalanyń bas memlekettik sanıtar dárigeri Jandarbek Bekshınniń aıtýynsha, balalarǵa vaktsına salǵannan keıin olarda «jasyl, «kók», qyzyl» mártebesi bolatyny týraly ázirge eshqandaı tapsyrma kelip túspegen.

«Qazirgi tańda balalar jáne jasóspirimderden senbi, jeksenbi kúni basqa mekemelerge kirgen kezde «jasyl» mártebesi suralmaıdy. Ekpe máselesi erikti túrde ótip jatyr. Bul másele boıynsha eshqandaı qosymsha tapsyrma túsken joq», – dedi Jandarbek Bekshın.

Buǵan deıin ol ata-analar vaktsına salý protsesine qatysa alatyny týraly aıtqan bolatyn. «Bul óte mańyzdy is-shara. Eger ata-analar qatysýǵa nıet bildirse, qatysa alady. Emhanalardaǵy ekpe salý pýnktteri demalys kúnderi de jumys isteıdi. Bolashaqta mektepterdegi medıtsınalyq pýnktterde de solaı bolmaq», – dedi ol.