Vaktsına saldyrǵannan keıin monshaǵa túsýge bola ma - maman jaýaby

ALMATY. QazAqparat- Almaty qalasy qoǵamdyq densaýlyq saqtaý basqarmasynyń ókili, telemedıtsına dırektory Laýra Myrzaǵalı onlaın brıfıng barysynda koronavırýsqa qarsy vaktsına saldyrǵannan keıin qalaı kútiný keregin túsindirdi, dep habarlaıdy QazAqparat tilshisi.

Onyń aıtýynsha, vaktsına ár adamǵa ártúrli áser etedi.

«Koronavırýs vaktsınasy adamnyń aǵzasyna qaraı reaktsııa beredi. Bireýde jeńil, endi bireýinde aýyr ótýi múmkin. Men de vaktsına saldyrdym. Jeńil ótti. Tek orny ǵana aýyrdy. Al menimen birge saldyrǵan áriptesterimniń keıbireýiniń dene qyzýy kóterildi, endi birinde qaltyraý boldy»,-deıdi spıker.

Sonymen qatar, ol ekpeden keıin kútiný kerektigin basa aıtty.

«Dene qyzýy kóterilse, ony túsirýge kómektesetin dáriler bolady. Olar antıbıotık emes, dene qyzýyn túsirýge arnalǵan paratsetamol, ıbýprofen sekildi preparattar. Solardy ishýge bolady. Monshaǵa baryp, sportpen aınalysýǵa da ruqsat. Biraq birinshi kezekte dene qyzýyn túsirý kerek. Odan keıin vaktsına saldyrǵannan keıin úsh kúndeı monshaǵa túsýge, sý tıgizýge bolmaıdy. Sol tártipti saqtaý qajet. Odan keıin adamnyń jaǵdaıyna qaraı shomylýǵa bolady. Ár nárse óz ornymen», - deıdi Laýra Myrzaǵalı.