Vaktsına saldyrǵan stýdentter iPhone jáne basqa da baǵaly syılyqtar utyp alýda
Aıta ketsek, buǵan deıin QR Bilim jáne ǵylym mınıstri Ashat Aımaǵambetovtiń tapsyrmasy boıynsha joǵary oqý oryndary bilim alýshylar men oqytýshylar arasynda vaktsına alýǵa yntalandyrý sharalaryn ázirlegen bolatyn.
S. Amanjolov atyndaǵy Shyǵys Qazaqstan ýnıversıtetinde búgingi tańda stýdentter men professorlyq-oqytýshylyq quramnyń 99%-y ekpe saldyrdy. Stýdentter jáne ýnıversıtet qyzmetkerleri arasynda túsindirý jumystary men vaktsına alýǵa yntalandyrý sharalary jalǵasyp jatyr. Birinshi bolyp vaktsına alǵan bilim alýshylar oqý aqysy men stýdentter úıinde turýǵa jeńildikter aldy. Sondaı-aq olarǵa ekpe saldyrǵan oqytýshylarmen birge fıtnes ortalyǵyna abonementter jáne demalys bazasyna joldamalar, aǵylshyn tilin oqytý kýrstaryna sertıfıkattar men IELTS/TOEFL testileýine daıyndyq sabaqtaryna jeńildikter berildi.
Safı Ótebaev atyndaǵy Atyraý munaı jáne gaz ýnıversıtetinde stýdentter arasynda Túrkistan qalasyna joldama oınatyldy. Stýdentter men oqytýshylar túrki áleminiń rýhanı astanasynda bolyp, ejelgi qalanyń kórikti jerlerimen tanysty.
Y. Altynsarın atyndaǵy Arqalyq pedagogıkalyq ınstıtýtynda vaktsına alǵan stýdentter arasynda utys oıynynyń ekinshi kezeńi ótkizildi. 10 stýdentke kitap satyp alýǵa arnalǵan 10 myń teńge somasynda sertıfıkattar berildi.
Toraıǵyrov ýnıversıtetinde ekpe saldyrǵan bilim alýshylar arasynda iPhone markaly uıaly telefondar, Baıanaýyl men Nur-Sultan qalasyna joldamalar, sondaı-aq jataqhanada turýǵa 50 paıyzdyq jeńildikter jáne fıtnes-zalǵa abonement oınatyldy.
D. Serikbaev atyndaǵy Shyǵys Qazaqstan tehnıkalyq ýnıversıtetinde vaktsına alǵan 70 stýdent 10 myń teńge kóleminde aqshalaı sertıfıkat aldy.
Sh. Ýálıhanov atyndaǵy Kókshetaý ýnıversıtetinde ekpe saldyrǵan stýdentter arasynda shıpajaıǵa joldamalar jáne 25 myń teńge kóleminde aqshalaı syılyqtar oınatylyp, utys oıynynyń ekinshi kezeńi ótkizildi. Sondaı-aq bilim alýshylar sporttyq-saýyqtyrý lagerine joldama aldy.
Pavlodar pedagogıkalyq ýnıversıtetinde stýdentter 10 myń teńge somasynda aqshalaı sertıfıkattar, kıno men teatr bıletteri, jol júrý bıletterin utyp, sondaı-aq jataqhanada turýǵa 50% jeńildik aldy.
Qostanaı óńirlik ýnıversıtetinde vaktsınanyń tolyq kýrsynan ótken stýdentter men qyzmetkerler arasynda utys oıyny boldy. Jeńimpazdar áskerı kafedranyń oqý aqysyna jáne jataqhanada turýǵa jeńildikter aldy. Qyzmetkerler arasynda «Sosnovyı bor» saýyqtyrý ortalyǵyna 10 joldama oınatyldy.
M. Ótemisov atyndaǵy Batys Qazaqstan memlekettik ýnıversıtetinde «Men ómirdi tańdaımyn!» aktsııasy uıymdastyryldy. Jeńimpazdar joǵary oqý ornynda oqýǵa jeńildikter, sonymen birge Nur-Sultan jáne Túrkistan qalasyndaǵy Qoja Ahmet ıAssaýı, Arystan Bab kesenelerine, Otyrar qalashyǵyna, «Kerýen-saraı» keshenine týrıstik joldamalar utyp aldy.