Vaktsına saldyrǵan balalardy úsh kún boıy baqylaımyz – Aqtóbeniń bas ınfektsıonısi

AQTÓBE. QazAqparat – Aqtóbede 12-18 jastaǵy balalar bilim ordasynda vaktsına saldyra alady. Olardy egý kezinde ata-analary janynda bolýǵa quqyly. Sonymen birge dárigerler úsh kún boıy baqylaý júrgizedi, dep habarlaıdy QazAqparat tilshisi.

Aqtóbede balalar men júkti áıelderdi vaktsınatsııalaý jumystaryn júrgizetin medıtsına qyzmetkerleri arnaıy biliktiligin arttyrdy.

Qazirgi kezde vaktsınany saqtaıtyn eki muzdatqysh Ana men bala ortalyǵynda tur.

Al emhana men bilim ordasyna jetkizilgen soń +2 +8 gradýsta saqtaýǵa bolady.

«Óz qorabynda saqtaý úshin -90-60 gradýs bolýy tıis. Saqtaý merzimi - 9 aı. Bizde muzdaqyshtar bar. Al tasymaldaǵan soń +2 +8 gradýsta saqtaýǵa bolady. Sol kúıimen 31 kún saqtaýǵa ruqsat berilgen. Bul vaktsına da eki komponentti. Monıtorıng júrgizildi, eskertýler qabyldanyp, qatelikter joıyldy», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.

Aıta keteıik, vaktsına ózge ekpeler sekildi áser etýi múmkin. Ekpe qabyldaǵan oryn qyzaryp, dene aýyrsa qalyp dep sanalady. Basy da aýyrýy yqtımal.

«Vaktsına saldyrǵan soń bala 30 mınýt arnaıy bólmede baqylaýda bolady. Keıin sabaǵyna barady nemese úıine jiberiledi. Úsh kún boıy baqylaımyz. Medıtsına qyzmetkerleri men muǵalimder nazaryna alady. Aýdıo, vıdeo materıal jiberýin suraımyz. Biz vıdeohabarlama joldaǵan durys dep oılap, sony surap otyrmyz. Kelisim berip jatqan, sol vaktsınany kútip otyrǵan jáne qarsy bolyp jatqan ata-analar bar», - dedi oblystyń bas ınfektsıonısi Meırambek Qurmanǵazın.