Vaktsına óndiretin álemdegi eń iri kásiporyn «Spýtnık V» shyǵarýdy qolǵa almaq

LION. QazAqparat – Álemdegi vaktsınanyń eń iri óndirýshisi jylyna 300 mıllıon dozaǵa deıin «Spýtnık V» shyǵarmaq. Úlken kólemdegi óndiris qyrkúıek aıynda Qan sarysýy ınstıtýtynyń (Úndistan) kúshimen ashylady, dep habarlaıdy QazAqparat Euronews agenttigine silteme jasap.

Bul týraly Reseıdiń tikeleı ınvestıtsııalar qorynda aıtyldy. Olar ónimdi tek Úndistannyń ózinde ǵana emes, sonymen qatar basqa memleketterge eksporttaýǵa jiberýdi josparlap otyr.

Úndistannyń qan sarysýy ınstıtýty búginde «Kovıshıld» dep atalatyn «Oksford-Astrazeneka» vaktsınasyn jasaýǵa qatysqan.

«Mundaı seriktestik «Spýtnıkti» álemde qoldanýdyń tamasha kórsetkishterin jańa deńgeıge shyǵarady. Bul – senimniń óte mańyzdy kórinisi. «Spýtnıktiń» keń kólemdegi óndirisi – bizdiń kovıdpen birlesken kúresimizdiń negizgi elementi», – dedi Reseı tikeleı ınvestıtsııalar qorynyń bas dırektory Kırıll Dmıtrıev.

Úndistan osy jyldyń mamyr aıynan bastap «Spýtnıkti» óndirý boıynsha iri habqa aınaldy: Reseı tikeleı ınvestıtsııalar qory birneshe kompanııamen kelisimder jasasty.

«Spýtnık V» álemniń 60-tan astam elinde maquldanǵan, degenmen áý basta olardyń kóbisi vaktsınany qoldanǵysy kelmegen.

Reseıden tys 9 elde bul preparattyń óndirisi bastaldy.

Osyǵan oraı, Reseı qorynyń basshylyǵy qyrkúıek-qazan aılarynda Dúnıejúzilik densaýlyq saqtaý uıymy «Spýtnık V» vaktsınasyn tirkeýi múmkin degen úmit bildirdi.

Ázirge Dúnıejúzilik densaýlyq saqtaý uıymy da, eýropalyq retteýshi de reseılik vaktsınany moıyndamaı otyr.