Vaktsına almaǵandar qajylyqqa bara almaıdy - mınıstrlik

ASTANA. QazAqparat - Qoǵamdyq densaýlyqty saqtaý komıtetiniń tóraǵasy Jandarbek Bekshın qajylyqqa shyǵatyn azamattarǵa vaktsına alý qajettigin eskertti, dep xabarlaıdy QazAqparat tilshisi. 

Jyl saıyn qajylyqqa álemniń 160 elinen shamamen 2 mıllıon adam attanady. Olardyń ishinde 3-4 myń qazaqstandyq ta bar.

«Barlyq adamdar qajylyqqa barar aldynda menıngokokk ınfektsııasyna qarsy egilýi qajet jáne olardyń ózderimen birge vaktsınatsııalaýdan ótkeni týraly anyqtamasy bolýy tıis. Bul - Saýd Arabııasy densaýlyq saqtaý mınıstrliginiń talaby», - dedi J.Bekshın Astanada ótken baspasóz máslıxatynda.

Onyń aıtýynsha, menıngokokk ınfektsııasyna qarsy vaktsınatsııany respýblıka boıynsha 5 jerde alýǵa bolady. Olar - Atyraý oblysy (Open clinic JShS fılıaly, Atyraý q., Stýdenttik tuıyq kóshesi, 205 A), Jambyl oblysy (KTǴKO JShS fılıaly, ZHANUYA emhanasy, Taraz q., Pýshkın kóshesi, 41), Ońtústik Qazaqstan oblysy (№ 1 Shymkent qalalyq aýrýhanasy, Shymkent q., G. Ilıaev kóshesi, 51), Almaty qalasy (Farmakom JShS vaktsınatsııalaý klınıkasy, Qarasaı batyr kóshesi, 30; Býzýrbaev kóshesi, 24; IMC Medıtsına ortalyǵy, Muqanov kóshesi, 235) jáne Astana qalasy (Open clinic JShS fılıaly, Astana q., Otyrar kóshesi, 8/2).

Sondaı-aq, qajylyq kezinde jeke gıgıena sharalaryn saqtaý qajet. Atap aıtqanda, dezınfektsııalaıtyn sýlyqtardy paıdalaný, qoǵamdyq jerlerde betperde taǵyp júrý, túıeler jınalatyn jerlerge jaqyndamaý, qaınatylmaǵan jáne pasterlenbegen túıe sútin qoldanbaý, ruqsat etilmegen saýda oryndarynda tamaq ónimderin almaý kerek. Al qajylyqtan keıin kez kelgen aýrý belgileri (qaltyraý, temperatýranyń kóterilýi, tamaq aýrýy jáne basqasy) paıda bolsa, dereý dárigerge habarlasqan jón. Qajylyqqa barǵany týraly birden aıtý qajet.

Aıta keteıik, J.Bekshın jaz kezinde toı taǵamdaryn daıyndaý qaýipsizdigine de toqtaldy. Onyń aıtýynsha, aldymen aspazdardyń kásibı daıyndyǵyn tekserip alý qajet. Bas aspazda sanıtarlyq kitapsha bolýy tıis. Syrttan adam tartýǵa bolmaıdy. Ydys-aıaqty jýyp turatyn adamdardyń sany da jetkilikti bolýy shart.

"Sosyn tamaqty saqtaıtyn arnaıy qural-jabdyqtardyń bar-joǵyn tekserip alǵan jón. Daıyn turǵan tamaq tońazytqyshta saqtalýy qajet. Meıramxanada ystyq sý bolýy tıis. Tazalyqqa basa mán berý kerek. Negizi, tamaq jasaıtyn jerdiń sanıtarlyq jaǵdaıy jappaı ýlanýǵa sebep bolyp jatady. Toıdyń dastarqanyn bir saǵat buryn jasaǵan durys. Odan erte jaıylsa, daıyn tamaqta mıkroaǵzalar tez ósedi. Sodan adam ýlanady. Árıne, tamaq ónimderiniń saqtaý merzimin únemi baqylap otyrý qajet", - dep atap kórsetti J.Bekshın.  

Budan bólek, Bas sanıtarlyq dáriger toıda jappaı ýlanýdyń basty sebebin atady. 

Qoǵamdyq densaýlyqty saqtaý komıteti jazǵy demalys kezinde birqatar memleketterde vırýstardyń órship turǵanyn eskertedi. 

Sonymen birge, J. Bekshın balalarǵa arnalǵan jazǵy lagerge qoıylatyn talaptardy da atap ótti.