Vaktsına almaǵan balalar sırek aýyrady - feık

NUR-SULTAN. QazAqparat - Qaznette keste boıynsha egilgenderge qaraǵanda ekpe jasatpaǵan balalardyń sırek aýyratyny týraly feık aqparat taratylýda, dep habarlaıdy QazAqparat stopfake.kz saıtyna silteme jasap.

Oǵan sáıkes, zertteýdi doktor Pol Tomastyń klınıkasy júrgizgen. Qorytyndy shyndyqqa janaspaıdy, al tujyrymnyń ózi – feık.

Pol Tomas vaktsınatsııalaýdyń zııany jáne indettiń oıdan shyǵarylǵandyǵy týraly málimdemelerimen tanymal. Sondaı-aq, amerıkalyq dáriger vaktsınatsııalaýdyń aýtızmniń damýyna áseri týraly teorııany da qoldaıdy.
Shyn máninde, bul mıf buryn áshkerelengen. Birqatar táýelsiz zertteýler aýtızm men vaktsınatsııalaýdyń arasynda eshqandaı baılanys joq ekenin dáleldedi.

Qaznet qoldanýshylary jarııalaǵan vaktsınatsııalanǵan jáne vaktsınatsııalanbaǵan balalardyń pedıatrǵa júginýler sany kórsetilgen kesteler durys dep aıtý qıyn. Onda zertteýge qatysýshylardyń sany da, ony júrgizý kezeńi de kórsetilmegen. Sonymen qatar, bul jaǵdaıda týa bitken patologııalardyń, sozylmaly aýrýlardyń, anamnezdiń bolýy nemese bolmaýy sııaqty basqa da mańyzdy faktorlar kórsetilmegen.
Alaıda, doktor Tomas osy sııaqty tájirıbeler arqyly ekpe jasatýdyń zııanyn dáleldeýge tyrysqan jalǵyz adam emes. Alaıda, onyń ózi de, onyń pikirlesteri de senimdi qorytyndy jasaı almady.

Sonymen qatar, DDSU saıtynda bes jasqa deıingi emdeletin aýrýlardan kóz jumǵan balalar arasyndaǵy ólim-jitim statıstıkasy jarııalandy. Jappaı vaktsınatsııalaý júrgizýge qarjysy jetpeıtin jáne balalardyń kópshiligi ekpe jasatpaǵan «úshinshi álem elderinde» kórsetkishter joǵary.

2018 jyly Eýropada qyzylsha aýrýynan 37 adam qaıtys boldy. Bul – sońǵy onjyldyqtaǵy rekordtyq kórsetkish. Mamandar jaqsy zerttelgen aýrýdyń ólim-jitim kórsetkishiniń kúrt ósýin ata-analardyń balalarǵa ekpe jasaýdan jappaı bas tartýymen baılanystyrdy.

Sarapshylardyń basym bóligi ýaqtyly vaktsınatsııalaý ólim jaǵdaılaryn edáýir tómendetýi múmkin degen pikirde. Kóptegen zertteýlerge sáıkes, vaktsınatsııalanǵan adam ekpe jasatqan aýrýmen aýyrsa da, aýrý jeńil túrde ótedi jáne asqyný jaǵdaılary bolmaıdy.

Jalpy, mektep jasyna deıingi balalar eresekterge qaraǵanda jıi aýyrady – ádette balalar 6-dan 12 ret JRVI-ge shaldyǵady. Aýrý aýyr túrde jáne uzaqqa sozylǵanda ǵana dabyl qaǵý kerek. Balanyń qanshalyqty jıi jáne aýyr túrde aýyratyny onyń ómir salty men tuqym qýalaýshylyǵyna baılanysty .

Budan vaktsınatsııalaýdyń balalardyń ımmýnıtetin tómendetedi degenge eshqandaı negiz joq. Kerisinshe, dáleldi medıtsınaǵa sáıkes, ımmýndaý qaýipti aýrýlardy boldyrmaýdyń joly bolyp tabylady.