Vaktsına alǵandardyń barlyǵynyń jaǵdaıy jaqsy – Asqar Mamın

NUR-SULTAN. QazAqparat – Qazaqstanda reseılik vaktsınany shyǵarý jolǵa qoıyldy jáne otandyq vaktsına da tirkeletin bolady. Bul týraly Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Qazirgi ýaqytta koronavırýs indetiniń ósýi baıqalady. Ásirese, «qyzyl» aımaqqa kirgen Almaty, Nur-Sultan qalalarynda jáne Batys Qazaqstan oblysynda. Vırýstyń reprodýktıvti kórsetkishi respýblıka boıynsha 1,1 quraıdy. Infektsııalyq aýrýhanalar 24% tolyq.

Vırýstyń taralý deńgeıiniń ósýi negizinen – halyqtyń shekteý sharalaryn, maska taǵý rejımin jáne áleýmettik qashyqtyqty jetkiliksiz saqtaý saldarynan bolyp otyr. Sondyqtan turǵyndar profılaktıkalyq jáne sanıtarııalyq normalarǵa joǵary jaýapkershilikpen qaraýy tıis», - deıdi QR Premer-Mınıstri.

Asqar Mamınniń aıtýynsha, vaktsınatsııa – koronavırýs ınfektsııasynyń taralýyna qarsy kúreste mańyzy joǵary faktor.

«Qazir vaktsınaǵa qoljetimdilikti qamtamasyz etý jáne jappaı egý – pandemııamen kúresýdegi basty mindet bolyp otyr. Aqpannyń basynan bastap halyqty vaktsınalaý bastaldy. Alǵashqylardyń qatarynda medıtsına qyzmetkerleri, odan keıin muǵalimder, polıtsııa men kúshtik qurylymdardyń qyzmetkerleri aldy. Vaktsına alǵandardyń barlyǵynyń jaǵdaıy jaqsy, vaktsına qalypty áser etti jáne teris saldary baıqalǵan joq. Qazaqstanda reseılik vaktsınany shyǵarý jolǵa qoıyldy jáne otandyq vaktsına da tirkeletin bolady», - deıdi ol.