Vaktsına alǵan adam qashan donor bola alady

NUR-SULTAN. QazAqparat – Koronavırýsqa qarsy vaktsına alǵan donor bola ala ma? Bul suraqqa ortalyq kommýnıkatsııalar qyzmetinde Densaýlyq saqtaý mınıstriniń birinshi orynbasary Marat Shoranov jaýap berdi, dep habarlaıdy QazAqparat.

«Jalpy vaktsına alǵan adamnyń donor bolýyna eshqandaı shekteý joq. Tek bir ǵana shekteý bar. Ekpe alǵannan keıin eki aptanyń ishinde donor bolýǵa bolmaıdy. Al jalpy ǵalymdardyń málimeti boıynsha ondaı shekteýler joq», - dedi vıtse mınıstr.

Osy sharada Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova vaktsına alǵan qazaqstandyqtardyń 0,05 paıyzy qaıta indet juqtyrǵanyn aıtty.

«Vaktsınalarǵa jiktep aıtsaq, «Spýtnık V» boıynsha 2 024 jaǵdaı anyqtaldy. Birinshi komponent – 1 190, ekinshi komponent – 834. QazVac boıynsha 40 jaǵdaı tirkeldi. Sáıkesinshe, 21 jáne 19. Hayat-Vax boıynsha 140 (89/51) jáne CoronaVac boıynsha 6 adam birinshi dozadan keıin koronavırýs juqtyrǵan. Osynyń bárin qossańyz 2 212 jaǵdaı shyǵady. Biraq bul málimetti absolıýtti sandar kóleminde qoldaný durys emes dep oılaımyn. Búginde bizde 4 mıllıonǵa jýyq adam ekpe alǵan. Sonyń 0,05 paıyzy vaktsına alǵannan keıin aýyrǵan degen sóz», - dedi Aıjan Esmaǵambetova.