V. Shkolnık: Egin oraǵy naýqany arzandatylǵan dızel otynymen qamtamasyz etiledi

ASTANA. QazAqparat - Egin egý men egin oraǵy naýqany tolyqtaı arzandatylǵan dızel otynymen qamtamasyz etiledi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Energetıka mınıstri Vladımır Shkolnık málim etti.

«Aı-92 benzıninen ózge munaı ónimderi naryǵynda jaǵdaı qalypty. Dızel otynynyń qory 300 myń tonnadan astam. Egin egý jáne egin oraǵy otynmen artyǵymen qamtyldy. Arzandatylǵan baǵamen dızel otyny aýyl sharýashylyǵy taýarlaryn óndirýshilerge der kezinde jetkizilip jatyr», - dedi mınıstr.

Munymen qosa ol qys merzimine daıyndyq jospar boıynsha júrip jatqandyǵyn, kommýnaldyq qajettilikter úshin mazýt jetkilikti kólemde tasymaldanyp otyrǵandyǵyn atap ótti.

Budan buryn habarlanǵandaı, Úkimet Aı-92/93 benzıni baǵasyn memlekettik retteýden bas tartty. Qazaqstan buryndary Reseıden jetpeıtin benzındi 97 teńgeden alǵan edi, ıaǵnı 1 rýbl - 2,95 teńge baǵamy boıynsha. Búginde teńgeniń erkin baǵamy aıasynda benzın 120 teńgeden satyp alynyp, 108 teńgeden satylýda. «Sáıkesinshe, shyǵynmen eshkim de jumys istegisi kelmeıdi. Eger osylaı jalǵassa, jaqyn arada, qyrkúıektiń aıaǵyna qaraı benzın tapshylyǵy týyndaıdy», - dedi Ortalyq kommýnıkatsııalar qyzmetindegi baspasóz máslıhatynda QR Premer-Mınıstriniń birinshi orynbasary Baqytjan Saǵyntaev.

«Aı-80 benzıni men dızeldik otynǵa baǵalar saqtalady, ıaǵnı bizde otynnyń bul túri artyǵymen bar. Atap aıtqanda, elimizde Aı-80 benzıni men dızeldik otyn jetkilikti kólemde shyǵarylyp jatyr. Bul turǵyda problema joq», - dedi ol.