Vetnammen aradaǵy taýar aınalymy sońǵy 7 jylda 2 ese artty - Premer

QR Premer-Mınıstri Álıhan Smaıylov pen Vetnamnyń vıtse-prezıdenti Vo Thı An Sýan ekonomıkalyq jáne áleýmettik-mádenı yntymaqtastyqty tereńdetý máselelerin talqylady, dep habarlaıdy QazAqparat Úkimettiń resmı saıtyna silteme jasap.

Taraptar saýda, tranzıt jáne logıstıka, týrızm, aýyl sharýashylyǵy salalaryndaǵy ózara is-qımyldyń ózekti máselelerin talqylady.

Premer-Mınıstr 1992 jyly dıplomatııalyq qatynastar ornaǵannan beri Qazaqstan men Vetnam syndarly dıalog ornatyp, ekijaqty ózara is-qımyldyń joǵary deńgeıine qol jetkizgenin atap ótti.

Onyń aıtýynsha, sońǵy 7 jylda eki el arasyndaǵy taýar aınalymy 2 ese artty. Buǵan 2015 jyly EAEO elderi men Vetnam arasyndaǵy erkin saýda aımaǵy týraly kelisimge qol qoıý yqpal etti.

«Biz qazirdiń ózinde qazaqstandyq eksportty 90 taýar ataýy boıynsha 500 mln-nan astam dollarǵa ulǵaıtýǵa daıynbyz», — dedi Álıhan Smaıylov.

Sonymen qatar Álıhan Smaıylov qazaqstandyq azamattarǵa Vetnamǵa vızasyz kirý múmkindigin berý máselesin kóterdi, bul eki el arasyndaǵy saýda jáne týrızmdi damytýǵa oń áser etedi.

Oǵan qosa, Premer-Mınıstr Qazaqstan aýyl sharýashylyǵy salasynda, ásirese kúrish sharýashylyǵyndaǵy yntymaqtastyqty keńeıtýge aıtarlyqtaı qyzyǵýshylyq tanytyp otyrǵanyn atap ótti.

«Bul daqyldy ósirip-baptaý boıynsha ǵylymı zertteýler men zamanaýı vetnamdyq tehnologııalardyń bizdiń elimiz úshin paıdasy bar. Biz osy baǵytta vetnamdyq áriptestermen iskerlik baılanystardy bastaýǵa ázirmiz», — dedi Úkimet basshysy.

Óz tarapynan Vo Thı An Sýan Vetnamnyń Qazaqstanmen yntymaqtastyqty nyǵaıtý máselelerine úlken mańyz beretinin atap ótti.

«Eki el arasyndaǵy senimdi saıası dıalog ózara áriptestikti odan ári keńeıtýge negiz bolyp otyr. Geografııalyq jaǵynan toǵyz joldyń torabynda turǵan Qazaqstan álemdegi iri naryqtardy biriktiredi. Biz ózara tıimdi baǵyttarda birlesip jumys isteý úshin naqty usynystardy qarastyrýǵa daıynbyz», — dedi Vo Thı An Sýan.

Foto: primeminister.kz