Vetnamda «100 naqty qadam» Ult josparynyń tusaýkeseri ótti (FOTO)
Bul týraly QR SІM baspasóz qyzmeti habarlady.
Іs-sharaǵa Hanoı ulttyq pedagogıkalyq ýnıversıtetiniń basshylyǵy, Vetnamnyń ǵylymı zııalylar men sarapshy qaýymdarynyń ókilderi, sondaı-aq ýnıversıtettiń professorlary, oqytýshylary, aspıranttar men stýdentteri qatysty. «Dóńgelek ústel» Qazaqstannyń Prezıdenti Nursultan Nazarbaev jarııalaǵan bes ınstıtýtsıonaldyq reformany talqylaýǵa arnaldy.
Qazaqstan Elshisi Beketjan Jumahanov óz sózinde aýdıtorııany elimizdiń saıası jáne áleýmettik-ekonomıkalyq salalarynda qol jetkizgen negizgi jetistikterimen tanystyryp, Elbasynyń «Nurly jol - bolashaqqa bastar jol» atty Qazaqstan halqyna joldaýyna erekshe nazar aýdardy. Qazaqstandyq dıplomat qatysýshylardy memlekettegi aýqymdy ınstıtýtsıonaldyq reformalar - 100 naqty qadam jahandyq jáne ishki syn-qaterlerge jaýap bolyp tabylatyn jáne sonymen bir mezgilde, jańa tarıhı jaǵdaılarda ulttyń 30 eń damyǵan memleketterdiń qataryna kirýi jónindegi josparymen tanystyrdy.
Іs-shara sheńberinde pikir almasý oryn alyp, vetnamdyq mamandar qazaqstandyq Ult josparyn zerdeleýge basa mán berdi. Tıimdi memleketti qurýdy jáne bilim salasynda ózgeristerdi kózdeıtin reformalar asa qyzyǵýshylyq týdyrdy. Ýnıversıtettiń vıtse-prezıdenti professor Do Vet Hýng Qazaqstannyń búgingi kúngi damýyn jáne eki eldiń arasyndaǵy ekijaqty qatynastardy damytýdyń keń keleshegin joǵary baǵalady. Ol Ult josparda kórsetilgen Qazaqstandaǵy memlekettik qurylys reformalarynyń ózektiligi men aýqymdylyǵyn atap ótti.
«Dóńgelek ústeldiń» qatysýshylaryna Qazaqstan týraly beınerolık usynylyp, vetnam tiline aýdarylǵan «100 naqty qadam» Ult jospary, sondaı-aq Qazaqstan týraly túrli aqparattyq materıaldar taratyldy.