Vetnam qazaq jazýshysyna medal tapsyrdy

  ASTANA. QazAqparat - Astanada ótken saltanatty sharada akademık, pýblıtsıst Baqytqoja Rústemovke Vetnam jazýshylar odaǵynyń medali tabystaldy, dep habarlaıdy QazAqparat tilshisi.

Marapat tapsyrý rásimi Vetnamnyń ulttyq kúnine arnalǵan saltanatty qabyldaý aıasynda ótti. Osy eldiń Qazaqstandaǵy elshisi Doan Thı Sýan Hıen hanym Qazaqstan men Vetnam arasyndaǵy dostyq qarym-qatynasty damytýǵa qosqan úlesi úshin birqatar azamattardy marapattady. Olardyń ishinde Grıgorıı Shıshov jáne Baqytqoja Rústemov bar. Pýblıtsıst B.Rústemov Vetnamnyń tarıhy men saıası júıesine arnalǵan eki birdeı kitapty shyǵardy. Sol úshin atalǵan eldiń jazýshylar odaǵy taǵaıyndaǵan medalǵa ıe boldy.

QazAqparat tilshisine suhbat bergen B.Rústemov vetnamdyqtardyń turmys-salty, sol jaqtaǵy kommýnıstik júıeniń eldiń damýyna qalaısha yqpal etip otyrǵany týraly aıtyp berdi.

  «Negizi, kóp nárse basshylarǵa baılanysty ǵoı. Eger basshy adal bolsa, qaı memleket bolsa da, jetistikke jetedi. Sebebi, halyqtyń qoldaýy bolady. Vetnam da solaı. Buryn olardy ekige bólip tastaǵan edi. Qazir halyqtyń birligi, otansúıgishtigi men patrıottyǵynyń arqasynda qaıtadan qosyldy. Ekonomıkasy da jaqsy damyp keledi», - deıdi B.Rústemov.

Jazýshy vetnam halqynyń minezin de jaqsy biledi. Onyń aıtýynsha, vetnamdyqtardyń basty ereksheligi - sabyrlylyq. Sonyń arqasynda álem boıynsha eń uzaq ómir súretin ulttardyń qataryna kirip otyr. Ortasha jasy - 80.

«Olar urys-tóbeles degendi túsinbeıdi. Bir-birine jekip sóılemeıdi. Máselen, Hanoıda 7 mln adam turady. Kóshesi yǵy-jyǵy. Sonda bir ursysqanyn kórmeısiń. Óte sabyrly halyq, kúıip-pispeıdi. Mektep oqýshylary da, stýdentteri de sondaı. Yntymaq-birligi myqty. Sonyń arqasynda soǵysta da jeńdi ǵoı», - dep atap kórsetti B.Rústemov.

Vetnamdyqtar tarıhı jádigerlerin kózdiń qarashyǵyndaı saqtaıdy. Kóne jer tabylsa, sony jan-jaqty zerttep, jaryqqa shyǵaryp jatady. Vetnamdyqtardyń arasynda musylmandar da az emes. Olar toptasyp turady.

«Biz olardy tolyǵymen býddıst dep oılaımyz. Joq, olaı emes. Musylmandar da bar. Olardyń attary Zýhra, Ábdirahman dep kete beredi. Meshitteri de bar», - deıdi B.Rústemov.

Aıta keteıik, Vetnam Sotsıalıstik Respýblıkasynyń Jazýshylar odaǵy Baqytqoja Rústemovty  vetnam ádebıetine qosqan úlesi úshin marapattady. Atalǵan medaldi álem boıynsha bes adam ǵana alǵan. Al Ortalyq Azııa jazýshysyna alǵash ret tabystalyp otyr.