V Dúnıejúzilik kóshpendiler oıyndaryna SQO-dan eki sáıgúlik qosylady

<p>PETROPAVL. KAZINFORM &ndash; V Dúnıejúzilik kóshpendiler oıyndaryna Soltústik Qazaqstan oblysy da qatysyp, Qazaqstan quramasynda óner kórsetpek. Qazirgi ýaqytta atbegiler kóptegen jarystarda aldyna jan salmaǵan &laquo;Akvamarın&raquo; jáne &laquo;Qamysqulaq&raquo; atty tulparlardy jaratyp jatyr.</p>

SQO dene shynyqtyrý jáne sport basqarmasynyń málimetinshe, «Akvamarın» atty sáıgúlik Azııa kýbogynyń bes dúrkin jeńimpazy, At sporty túrlerinen oblys Kýbogynda jeti shaqyrym qashyqtyqtaǵy jorǵa jarysta máre syzyǵyn birinshi bolyp kesip ótti. Aıyrtaý aýdanynda ótken ulttyq sport túrleriniń oblystyq festıvalinde jáne Almaty oblysynyń Kýbogynda kezekti jeńiske jetti. 

«Toǵyz jasar frantsýz jylqysy babynda, óte eńbekqor, jigerli, ıkemdi ári aqyldy. Oǵan qandaı talap qoıylǵanyn birden uǵady. Jalpy «Akvamarın» qazir ıppodromdaǵy eń myqty jylqylardyń biri», - deıdi at sportynan QR sport sheberi Evgenıı Chıbısov.

«Qamysqulaq» atty eki jasar qunandy V Dúnıejúzilik kóshpendiler oıyndarynda óner kórsetýge atbegi Qýanysh Shahambaev daıyndap jatyr. Qýanysh kezinde at jarystarda jokeı retinde óner kórsetti, al qazir jarystarǵa jylqylardy jaratýmen aınalysady. «Qamysqulaq» tamyz aıynyń basynda Pavlodar oblysynda ótken Qazaqstan chempıonatynda qunan báıgege qatysty. On shaqyrym qashyqtyqty ońaı eńserip, jeńiske jetti. Endi V Dúnıejúzilik kóshpendiler oıyndarynda 11 km qashyqtyqtaǵy qunan báıgege qatysady. 

Buǵan deıin ǵalymdar ejelgi ıt tuqymdarynyń derekter bazasyn qurǵanyn jazǵan edik.