V AEF sheńberinde halyqaralyq jáne otandyq medıtsına mamandary saladaǵy ózekti máselelerdi talqylaıdy

ASTANA. 23 mamyr. QazAqparat - V Astana ekonomıkalyq forýmy aıasynda 100-den astam halyqaralyq jáne otandyq sarapshy bas qosyp, onkologııalyq kómek kórsetýdi damytý, densaýlyq saqtaý salasyna ınvestıtsııalardy tartý jáne basqa da ózekti máselelerdi talqylaıtyn bolady.

Bul týraly QR Densaýlyq saqtaý mınıstrliginiń baspasóz qyzmetinen málim etti.

Paneldi sessııa otyrysy 24 mamyr kúni «Nazarbaev Ýnıversıtetinde» «Medıtsına jáne farmatsevtıkalyq ónerkásipti damytýdyń ózekti máseleleri» taqyrybymen ótedi.

Qatysýshylardyń arasynda 2009 jyly hımııa boıynsha Nobel syılyǵyn alǵan Ada Ionat (Izral), fızıologııa jáne medıtsına boıynsha 1993 jylǵy Nobel syılyǵynyń ıegeri, Sheffıld (Ulybrıtanııa) ýnıversıtetiniń professory Rıchard Djon Roberts, hımııa boıynsha 1993 jylǵy Nobel syılyǵynyń laýreaty, Oklend (AQSh) ǵylymı-zertteý ınstıtýty jáne balalar aýrýhanasynyń eńbek sińirgen ǵylymı qyzmetkeri Kerı Benks Mýllıs, Stokgolmdegi (Shvetsııa) Koroldik Karolın medıtsınalyq ınstıtýtynyń halyqaralyq densaýlyq saqtaý professory Hans Roslıng, Dúnıejúzilik densaýlyq saqtaý uıymynyń Eýropa bıýrosynyń densaýlyq saqtaý júıesi jáne qoǵamdyq densaýlyq bóliminiń dırektory Hans Klıýge jáne basqalary bar.             

Paneldi sessııada onkologııalyq kómek kórsetýdi damytý, azamattardyń óz densaýlyǵyna ortaq jaýapkershiligin qalyptastyrý, densaýlyq saqtaý salasynda memlekettik saıasatty qalyptastyrýdaǵy ǵylymnyń róli, ınvestıtsııalar tartý jáne basqa máseleler qozǵalady.

Sonymen qatar, QR Densaýlyq saqtaý mınıstrligi men farmatsevtıkalyq kompanııalar arasynda memorandýmdarǵa qol qoıý josparlanyp otyr.