Ujymdyq ımmýnıtetti qalyptastyrýǵa tek vaktsına kómektesedi – dáriger

ALMATY. QazAqparat- Qazaqstandy ǵana emes, búkil álemdi basyp alǵan koronavırýs pandemııasyn jeńý úshin halyq vaktsınalaný protsesinen ótýi tıis. Mundaı pikirdi Almatydaǵy №36 qalalyq emhananyń bas dárigeri Gúljaınat Tilegen bildirdi, dep habarlaıdy QazAqparat tilshisi.

«Halyqtyń basym bóligi vaktsına almaıynsha, biz indetti jeńýge kómektesetin ujymdyq ımmýnıtetke qoljetkize almaımyz. Koronavırýsqa qarsy vaktsına bizdiń densaýlyǵymyzdy, jaqyndarymyzdyń densaýlyǵyn saqtaýǵa jáne adamdardy qalypty ómir saltyna qaıtarý úshin jasalǵan», - dedi Gúljaınat Tilegen.

Dárigerdiń aıtýynsha, vaktsına almaǵan naýqastyń jaǵdaıy aýyr bolady, keıin aǵza nasharlaıdy, ınfektsııa tasymaldaýshysyna aınalyp tipti qaıǵyly jaǵdaıǵa dýshar bolýy múmkin.

«Adamdar KVI-ge qarsy vaktsınatsııadan keıin aýyryp qalǵan jekelegen jaǵdaılar bar. Biraq eger adam vırýsqa qarsy ımmýnıtetke ıe bolsa, ımmýnıtet vırýsty óltiredi. Aýrýdan 100% qorǵaı alatyn birde-bir vaktsına joq. Degenmen, COVID-19 vaktsınasy qorǵanýdyń tıimdi ádisi. Óıtkeni, vaktsınalanǵan patsıentterdiń aýrýy jeńil ári sımptomsyz bolady. Dert asqynbaıdy, qaıǵyly jaǵdaı bolmaıdy», - deıdi ol.

Bas dáriger vaktsınalanǵan adamdardyń aýrýǵa shaldyǵýynyń sebepteriniń biri vaktsınatsııadan keıingi kezeń dep sanaıdy, óıtkeni ekinshi komponent engizilgennen keıin ımmýnıtetti qalyptastyrý úshin ortasha eseppen 3 apta úzilis qajet.

Sonymen qatar, koronavırýs ınfektsııasynyń aldyn alý sharalaryn saqtaý mańyzdy ról atqarady.

«Kóptegen naýqas vaktsınany alǵannan keıin koronavırýs ınfektsııasyna qarsy barlyq qaýipsizdik sharalaryn tolyq oryndaýdan bas tartady. Immýnıtetti tek vaktsına ǵana emes, ómir salty, durys tamaqtaný, uıqy qalyptastyratynyn aıtqym keledi. Sondyqtan biz barlyq naýqastardy vaktsına alýǵa jáne medıtsınalyq qyzmetkerlerdiń barlyq usynystaryn oryndaýǵa shaqyramyz – adamdar kóp jınalatyn jerlerden aýlaq bolyp, betperde taǵý qajet», - dedi Gúljaınat Tilegen.