Ujymdyq ımmýnıtet qalyptastyrý mańyzdy bolyp tur - Manar Smaǵul

NUR-SULTAN. QazAqparat – QR DSM Ulttyq qoǵamdyq densaýlyq saqtaý ortalyǵy sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy dırektorynyń orynbasary Manar Smaǵul vaktsınanyń indetpen kúrestegi rólin túsindirdi, dep habarlaıdy QazAqparat tilshisi.

«Ekpeniń medıtsınanyń eń úlken jetistigi ekenin atap ótken jón. Qazirgi ýaqytta vaktsınalar juqpaly aýrýlarǵa qarsy eń tıimdi qorǵanys amaly bolyp otyr. Ekpe jasaý arqyly sheshek sııaqty aýrýlar joıyldy. Vaktsınanyń tıimdiligi men jetistikteri týraly tolassyz aıtýǵa bolady. Osydan 20 jyl buryn álem boıynsha kóp memlekette polıomıelıt aýrýy órshise, qazirgi ýaqytta vaktsına arqyly onyń taralýy azaıdy. Vaktsına egý arqyly qyzylsha, gepatıt jáne basqa da aýrýlardyń juǵý deńgeıi tómendedi», - deıdi M. Smaǵul.

Osy oraıda ol múmkindigi bar barlyq elder kúsh-jigerin koronavırýsqa qarsy vaktsına jasaýǵa baǵyttaǵanyn eske saldy.

«Shekteý is-sharalary jaǵdaıynda 1 jyldan astam ýaqyt turyp jatyrmyz. Bul turǵyda vaktsına qozǵalys, qarym-qatynas erkindigin beredi. Osy oraıda koronavırýstyń taralýyna tosqaýyl qoıamyz degen oıdamyn», - dep atap ótti sarapshy Manar Asyrqyzy.

Bul rette sarapshy koronavırýsqa qarsy vaktsınanyń shyǵarylýy búkil álemdi alańdatqan indettiń tıimdi aldyn alý qadamyna qol jetkizýdi bildiretinin atap ótti.

Onyń sózine qaraǵanda, ekpe qanshalyqty tez daıyndalsa da, ony ázirleýge jáne óndirýge óte joǵary talaptar qoıylyp otyr.

Atap aıtqanda, vaktsınanyń sapasyna qoıylatyn bul qatań talaptar eshqashan ózgermeıdi.

Ekpe jappaı paıdalanýǵa berilse, demek ol barlyq qaýipsizdik talaptaryna jáne álemdik standarttarǵa saı keledi degen sóz.

«Vaktsınalanǵan adamdar kóp bolǵan saıyn, qozdyrǵyshtardyń taralý keńistigi tarylady. Ekpe saldyrǵandar kóbeıgende vırýstyń taralýy da shekteledi. Vaktsınatsııa saıasaty osyǵan negizdelgen. Koronavırýsqa qarsy vaktsınalaý týraly aıtqan kezde, bizdiń maqsat – ujymdyq ımmýnıtetti qalyptastyrý», - dedi Manar Smaǵul.

Sonymen qatar ortalyq ókili vırýstyń jańa mýtatsııalaryna qatysty pikir bildirdi.

«Qazir jasalynǵan nemese qazirdiń ózinde maquldanǵan COVID-19 vaktsınalary vırýstyń jańa nusqalarynan kem degende belgili bir dárejede qorǵaýdy qamtamasyz etedi, óıtkeni olar ártúrli antıdeneler men jasýshalardyń qatylýymen keń ımmýndyq jaýapty týdyrady. Sondyqtan vırýstyń ózgerýi nemese mýtatsııasy vaktsınalardyń tıimdiligin joqqa shyǵarmaýy kerek», - deıdi Manar Asyrqyzy.