«Úzdik tárbıeshiler» «úzdik pedagogtermen» birdeı deńgeıde marapattalady

<p>ASTANA. KAZINFORM &ndash; &laquo;Úzdik pedagog&raquo; baıqaýynyń úlgisinde &laquo;Úzdik tárbıeshi&raquo; baıqaýy paıda bolady. Buǵan deıin mektepke deıingi bilim berý uıymdarynyń úzdik mamandary mınıstrlikke baǵynyshty ınstıtýt deńgeıinde marapattalyp kelse, endi olarǵa mınıstrlik deńgeıinde qurmet kórsetilmek.</p>

Bul týraly Oqý-aǵartý mınıstrligi Mektepke deıingi bilim berý departamentiniń dırektory Manara Adamova ortalyq kommýnıkatsııalar qyzmetinde ótken baspasóz máslıhatynda aıtty.

«Bilim týraly zańnyń aıasynda «Mektepke deıingi uıymnyń úzdik pedagogi», «Mektepke deıingi uıymnyń úzdik ádiskeri», «Úzdik mektepke deıingi uıym» deıtin baıqaýlar qazir de bar. Biraq ony Oqý-aǵartý mınıstrliginiń balalardy erte damytý ınstıtýty júrgizedi. Al ondaı mártebeniń laıyqty útemeaqysy nemese syıaqysy bolý úshin zańnamaǵa ózgerister men tolyqtyrýlar engizilip jatyr», - dedi ol.

Aıtýynsha, buǵan deıin zań normalary bul baıqaýdyń deńgeıin shektep kelgen.

«Qazir biz osy máseleni kóterip, birge mektepke deıingi uıym pedagogteriniń baıqaýyn da mektep pedagogteriniń baıqaýynyń dárejesine kóterý úshin usynystar qosyp jatyrmyz. Sondyqtan aldaǵy ýaqytta bolady den senemiz, biz de kútemiz. Buǵan deıin nege bolmady? Óıtkeni mektepke deıingi bilim berý uıymy zań boıynsha mindetti emes deńgeı. Balalar mektepke deıin úıde de tárbıelenýi múmkin degendeı. Biraq «Bilim» zańynda 5 jastan bastap bala mektepke daıyndalýy kerek ekeni, bul daıyndyq mindetti ekeni týraly 30, 31-baptar bar. Biz óz usynysymyzdy osy baptarǵa súıenip engizip jatyrmyz», - dedi Manara Adamova.

Qazirgi ýaqytta balalardy mektepke deıingi uıymdarǵa qabyldaýdyń ashyqtyǵyn qamtamasyz etý úshin mınıstrlik derbestendirilgen qarjylandyrýǵa kóshý tetigin synaqtan ótkizýde. Ata-analardyń mektepke deıingi uıymdardy derbes tańdaýy jáne «qarajatty balanyń sońynan ilestirý» qaǵıdaty boıynsha berilgen aqshalaı qarajatty vaýcher arqyly MDU-ǵa aýdarý sybaılas jemqorlyq táýekelderin azaıtady dep kútilýde.