Úzdik jas qalamger: elordanyń 25 jyldyǵyna oraı baıqaý jarııalandy

ASTANA. QazAqparat – Elordanyń 25 jyldyǵyna oraı Astana qalasynyń Jastar saıasaty máseleleri basqarmasy jas aqyndar men jazýshylardy qoldaý maqsatynda «Úzdik jas qalamger» baıqaýyn jarııalaıdy, dep habarlaıdy QazAqparat qala ákimdiginiń resmı saıtyna silteme jasap.

Baıqaýǵa 14-35 jas aralyǵyndaǵy elordalyq jas aqyndar men jazýshylar qatysa alady. Ár júldeli 25 qatysýshyǵa – 500 myń teńge qarjylaı syılyq qarastyrylǵan.

Maqsat – jas aqyndar men jazýshylarǵa shyǵarmashylyq damýy úshin jaǵdaı jasaý jáne jastardyń oń bastamalaryna qoldaý kórsetý, týǵan elge degen yqylas pen mahabbatty arttyrý, qazaq halqynyń dástúrlerin jan-jaqty zerdeleý arqyly jastardyń aqyndyq sheberligin shyńdaý, ulttyq mádenıet arqyly otansúıgishtik sezimdi damytý, qazaq tiliniń rólin kóterý, daryndy jas aqyndar men jazýshylardy anyqtaý jáne olarǵa sheberligin shyńdaýǵa múmkindik berý.

Baıqaýǵa qatysý úshin mynadaı qujattar usynylady:

- konkýrsqa qatysý týraly ótinim

- jas aqyndar men jazýshylardyń shyǵarmalary.

Shyǵarmalar 5 shildege deıin [e-mail] elektrondy poshtasyna joldanýy qajet.

Konkýrs jóninde tolyq aqparatty Astana qalasynyń Jastar saıasaty máseleleri basqarmasynan 8-701-830-65-30 telefon nómiri arqyly alýǵa bolady. Mekenjaıy: Astana qalasy, Saryarqa dańǵyly, 13.