«Úzdik pedagog» ataǵy ıegerine 3,5 mln teńge syıaqy beriledi

ASTANA. QazAqparat – Elimizde «Úzdik pedagog» respýblıkalyq baıqaýy bastaldy. Oǵan menshik nysanyna jáne vedomstvolyq baǵynystylyǵyna qaramastan barlyq mektepke deıingi, orta, tehnıkalyq jáne kásiptik bilim berý uıymdarynyń shtattyq pedagog qyzmetkerleri qatysa alady, dep habarlaıdy QazAqparat Oqý-aǵartý mınıstrligine silteme jasap.

Atap ótý kerek, konkýrs úsh kezeńnen turady: aýdandyq, oblystyq jáne respýblıkalyq. Úmitkerdiń pedagogıkalyq qyzmette joǵary jetistikteri jáne konkýrsqa qatysý kezinde keminde bes jyl úzdiksiz pedagogıkalyq tájirıbesi bolýy kerek.

Baıqaýdyń birinshi kezeńine qatysýǵa 1311 ótinim berilgen. Qazir aýdandyq, qalalyq komıssııa olardyń portfolıosyn baǵalaý jumystaryn júrgizip jatyr.

Ekinshi kezeńde ár aýdan, qaladan 100 upaıdyń 80 paıyzynan kem emes upaı jınaǵan 10 qatysýshy tańdalady. Respýblıkalyq baıqaýdyń úshinshi kezeńi osy jyldyń qyrkúıek aıynda ótedi.

Respýblıkalyq kezeńniń qorytyndysy boıynsha 64 jeńimpaz «Úzdik pedagog» kýáligimen, «Úzdik pedagog» tósbelgisimen jáne 1 000 AEK (3 450 000 teńge) kóleminde aqshalaı syılyqpen marapattalady.