Úzdik oqytýshy: Maqsatym - shetelde taǵylymdamadan ótý

ALMATY. QazAqparat - «Joǵary oqý ornynyń úzdik oqytýshysy – 2021» baıqaýy jeńimpazdarynyń biri, ál-Farabı atyndaǵy QazUÝ jylý fızıkasy jáne tehnıkalyq fızıka kafedrasynyń aǵa oqytýshysy, tehnıka ǵylymdarynyń kandıdaty, matematıka jáne mehanıka ǵylymı zertteý ınstıtýty dırektorynyń orynbasary Rústem Manatbaev QazAqparat tilshisine alǵa qoıǵan josparlary týraly aıtyp berdi.

Rústem Manatbaevtyń joǵary oqý ornynda jumys istep jatqanyna 20 jylǵa jýyqtady. Osy ýaqyt aralyǵynda ol júzdegen maman daıyndaýǵa atsalysty.

«Jas urpaqqa sapaly bilim jáne ónegeli tárbıe berý – búgingi kúnniń basty máselesi. Táýelsiz memleketimizge qajet eńbekqor, kásibin tereń túsinetin, bilimi men iskerligin jan-jaqty qoldana biletin mamandardy daıyndaý – oqý oryndarynyń aldynda turǵan negizgi talap. Sonymen qatar, stýdentterdiń bolashaqta bilimdi de bilikti maman bolyp qalyptasýyna oqytýshy da zor áserin tıgizeri sózsiz. Men 20 jylda 35 magıstrant daıyndadym. Qazir doktoranttardy daıyndap jatyrmyn. Jaqynda eki shákirtim jazǵan eńbekterin qorǵaıdy»,- deıdi Rústem Manatbaev.

Keıipkerimizdiń jel energetıkasy salasynda 3 patenti jáne 90-nan astam ǵylymı jarııalanymy bar.

«Meniń jel energetıkasy boıysha eki halyqaralyq jáne bir ulttyq patentim bar. Sonymen qatar, 90-nan astam ǵylymı jumystarym jarııalandy. Onyń 15-i reıtingisi joǵary jýrnaldarǵa shyqty. Bul - meniń kópjyldyq eńbegimniń jemisi» - deıdi ol.

Ál-Farabı atyndaǵy QazUÝ jylý fızıkasy jáne tehnıkalyq fızıka kafedrasynyń aǵa oqytýshysy sóz arasynda kitap jazyp jatqanyn da tilge tıek etti.

«Búgingi kúnge deıin bir monagrafııa jáne bes oqý quralyn jazdym. Taǵy bir ǵylymı kitap jazyp jatyrmyn. Bıyl jaryqqa shyǵady»,- deıdi tehnıka ǵylymdarynyń kandıdaty.

Onyń aıtýynsha, «Joǵary oqý ornynyń úzdik oqytýshysy – 2021» baıqaýynyń jeńimpazy ataný úlken jaýapkershilik júkteıdi.

«Birinshiden, jeńimpaz atanǵanyma óte qýanyshtymyn. Bul baıqaý JOO-nyń oqytýshylaryn jigerlendiredi, alǵa qoıǵan maqsatyna jetýge yqpal etedi dep oılaımyn»,- deıdi ol.

Rústem Manatbaev aldaǵy josparyn bólisti.

«Bıyl maýsym aıynda Qazaqstan, Qytaı jáne Bolgarııanyń joǵary oqý oryndary birigip halyqaralyq konferentsııa ótkizemiz. Osy konferentsııanyń teń tóraǵasymyn. ıAǵnı, uıymdastyrý jumysyna atsalysamyn. Aýqymdy shara Bolgarııada ótedi. Konferentsııada mamandar balamaly energetıka salasy jaıynda sóz qozǵaıdy. Sonymen qatar, reıtingisi joǵary sheteldik jýrnalǵa maqala jarııalaý da oıymda bar. Sheteldik JOO-nan bir aı taǵylymdamadan ótý josparymda»,- deıdi Rústem Manatbaev.

Buǵan deıin Almatyda 2021 jylǵy «Joǵary oqý ornynyń úzdik oqytýshysy» ataǵynyń ıegerleri marapattalǵanyn jazǵan bolatynbyz.