Úzdik Koreıa ýnıversıtetine qalaı túsýge bolady
Astana qalasyndaǵy Nazarbaev zııatkerlik mektebi baspasóz qyzmetiniń habarlaýynsha, úmitkerler 19 shilde kúni Astana men Almaty qalalaryndaǵy Nazarbaev Zııatkerlik mektepterinde baq synaǵan. Emtıhan bıyl osymen úshinshi ret uıymdastyrylyp otyr.
«Bizdiń ýnıversıtet Ońtústik Koreıada ornalasqan. Bul jerde Hyundai, Samsung, LG sekildi ózderińizge jaqsy tanys alpaýyt kompanııalar ornalasqan. Qazaqstandyq stýdentter naryqqa paıdaly barlyq mamandyqtarda bilim ala alady. Koreıa Respýblıkasy damyǵan elderdiń qataryna jatady. Biz taýar óndirýshi elmiz. Sondyqtan qazaqstandyq jastar bizden bilim men tájirıbe jınaqtap, óz eliniń damýyna at salysa alady», deıdi Pýsan ulttyq ýnıversıtetiniń professory Sangıan Kım.
Sonymen qatar, Koreıadan kelgen qonaqtar ózderiniń oqý oryndary jaıly oqýshylar men ata-analarǵa baıandama jasady.
Pýsan - Koreıa Respýblıkasyndaǵy eń iri port jáne Seýlden keıingi eń iri qala. Jergilikti jurt bul qalany «Koreıanyń teńiz astanasy» dep te ataıdy. Tikeleı ortalyqqa baǵynatyn Pýsan qalasy Koreı túbeginiń ońtústik-shyǵys bóliginde, Koreı buǵazynyń jaǵalaýynda ornalasqan
Pýsan ulttyq ýnıversıtetiniń ekinshi kýrs stýdentteri Juparova Ázel, Syrymbetova Zaǵıra, Sadýaqas Alısherdiń aıtýynsha, teńiz jaǵasynda ornalasqan Pýsan qalasy ádemiligi jaǵynan eshqandaı qalaǵa kem túspeıdi. Pýsannyń aýasy ylǵaldy, jańbyr kóp jaýady. Ýnıversıtettiń oqý baǵasy bir semestr úshin 2 myń dollar shamasynda.
Sondaı-aq, Nazarbaev zııatkerlik mektepterimen Pýsan ulttyq ýnıversıtetiniń arasynda arnaıy kelisimshart bar. Osy qujat boıynsha qazaqstandyq túlekter koreı tilin bilmese de oqýǵa qabyldanady. Olar eki jyl boıy arnaıy beıimdelgen baǵdarlama arqyly koreı tilin qatar úırenedi.
2002 jyldary Pýsanda Azııa oıyndary jáne fýtboldan FIFA World Cup álem chempıonaty ótti. Al 2005 jyly Azııalyq Tynyqmuhıt aralyq ekonomııalyq áriptestik forýmynyń astanasy atandy.