«Úzdik qazaqtildi ınternet-saıt syılyǵy» baıqaýyna ótinimder qabyldanýda
Baıqaý maqsaty - ınternet júıesindegi úzdik qazaqtildi resýrstardy anyqtaý. Sondaı-aq olardyń sany men sapasyn arttyrýǵa, aqparat keńistiginde qazaq tiliniń qoldanys aıasyn keńeıtýge yqpal etý.
Aıta ketken jón, baıqaý osymen úshinshi ret ótkizilip otyr. Ótken eki jylda 17 otandyq qazaqtildi saıttar baıqaý laýreattary atanyp, aqshalaı syılyqqa ıe boldy.
Syılyq mynadaı nomınatsııalar boıynsha taǵaıyndalady:
«Ótkir til» - qazaq tilin jáne ulttyq qundylyqtardy nasıhattaýshy úzdik saıt;
«Rýhanı azyq» - qazaq ádebıeti men mádenıeti týraly materıaldardy shyǵaratyn úzdik saıt;
«Tereń izdenis» - qazaq eliniń tarıhyn nasıhattaýshy úzdik saıt;
«Shynaıy ómir» - qoǵamdaǵy ózekti máselelerdi talqylaıtyn úzdik saıt;
«Sport tynysy» - salaýatty ómir salty men sportty nasıhattaýshy úzdik saıt;
«Bilim bulaǵy» - bilim beretin úzdik saıt;
«Jastar álemi» - jastar taqyrybyna arnalǵan úzdik saıt;
«Aımaq aınasy» - úzdik aımaqtyq saıt;
«Balalarǵa bazarlyq» - balalarǵa arnalǵan úzdik saıt;
«Oıyn- saýyq» - úzdik oıyn-saýyq saıty.
Árbir nomınatsııa boıynsha jeńimpazǵa 385 myń teńge kóleminde aqshalaı syılyq tapsyrylady. Baıqaý qorytyndysy osy jylǵy qarasha aıynyń sońynda shyǵady.
Baıqaý jeńimpazdaryn belgili qoǵam qaıratkerleri, qalamger-jýrnalıster men baıqaý quryltaıshylarynan jasaqtalǵan qazylar alqasy anyqtaıdy.
Qazylar alqasy saıttardy mazmuny, qyzmet baǵyty, ınteraktıvtiligi, kórkemdik jaǵy, ıdeıa ereksheligi, tartymdylyǵy sekildi talaptar boıynsha saralaıtyn bolady.
Eske sala ketsek, baıqaýǵa úkimettik emes, táýelsiz qoǵamdyq saıttar, ǵalamtor keńistigindegi tájirıbesi keminde bir jyldy quraıtyn, qazaq tilinde aqparat taratatyn jáne qyzmet túri Qazaqstan Respýblıkasynyń qoldanystaǵy zańnamasyna qaıshy kelmeıtin kez kelgen saıt qatysa alady. Baıqaýǵa memlekettik organdardyń, sheteldik uıymdardyń, buqaralyq aqparat quraldarynyń elektrondy nusqalary (gazet, tv, radıo) qatysa almaıdy.
Baıqaý erejesimen Qazaqstan Respýblıkasy Tuńǵysh Prezıdenti - Elbasy qorynyń www.fpp.kz jáne Memlekettik tildi damytý qorynyń www.qazaq-found.kz saıttarynan tanysýǵa bolady.
Baıqaýǵa ótinimder Memlekettik tildi damytý qorynyń info@qazaq-found.kz elektrondy mekenjaıyna 2018 jyldyń 10 qyrkúıeginen 10 qarashasyna deıin jiberilýi tıis.