«Úzdik ǵylymı qyzmetker» konkýrsynyń erejeleri ózgertilmek

NUR-SULTAN. QazAqparat – Jyl saıyn ǵylym salasynyń mamandaryna tabystalatyn «Úzdik ǵylymı qyzmetker» konkýrsyna qatysý erejeleri ózgerýi múmkin. Jańa tártipter engizilgeli otyrǵan buıryq jobasy «Ashyq» NQA saıtynda jarııalandy, dep habarlaıdy QazAqparat tilshisi.

Mınıstrlik ózgerister otandyq ǵalymdardy qoldaý jáne konkýrs úshin qajetti qujattarǵa qatysty bıýrokratııadan arylý maqsatynda jasalyp otyrǵanyn jetkizdi.

«Úzdik ǵylymı qyzmetker» konkýrsyna qatysý úshin endi mynadaı talaptar qoıylady:

• Konkýrsqa JOO-nyń nemese joǵary oqý oryndarynan keıingi bilim berý uıymdarynyń shtattyq ǵylymı qyzmetkerleri qatysady. Qatysýshydan qandaı da bir qyzmet ornynda jumys isteıtinin rastaıtyn anyqtama suralmaıdy;

• Bir márte atalǵan syılyqty alǵan adam endi konkýrsqa tek 10 jyldan keıin qatysa alady. Buryn bir ret syılyq ıelengen ǵylymı qyzmetker óz kandıdatýrasyn 5 jyldan keıin qaıta usyna alatyn;

• «Joǵary oqý ornynyń úzdik oqytýshysy» ataǵynyń ıegerleri atalǵan konkýrsqa on jyl ishinde qatysa almaıdy;

• Qatysýshynyń ǵylymı zertteýleri ekonomıkaǵa, qoǵamǵa, densaýlyq saqtaý, mádenıet, eldi basqarý, memlekettik qyzmetterge, óndiriske, bilimge jáne qorshaǵan ortaǵa paıdasy tıgen bolýy kerek;

• Kandıdattyń qujattarynyń tolyqtyǵyn tekserý merzimi alynyp tastalady. Buryn 10 kún ishinde qujattardyń tolyq ári dáıekti bolýy tekseriletin;

• Komıssııa músheleri múddeler qaqtyǵysy bolǵan jaǵdaıda kandıdattyń ǵylymı jetistikterin baǵalaý jumystaryna qatyspaıdy;

• Komıssııanyń jeńimpaz týraly sheshimi kópshilik daýyspen qabyldanady. Berilgen daýystar teń bolǵan jaǵdaıda, komıssııa tóraǵasynyń daýysy sheshýshi bolyp tabylady;

• Úmitker jalǵan nemese dáleldenbegen málimet usynsa, komıssııa sheshimimen ol kelesi 3 jyl ishinde «Úzdik ǵylymı qyzmetker» jáne «Joǵary oqý ornynyń úzdik oqytýshysy» konkýrstaryna qatysýyna tyıym salynady.

Buıryq 15 tamyzǵa deıin ashyq talqylaýǵa shyǵaryldy.