«Úzdik aýyl ákimi» baıqaýynyń jeńimpazy anyqtaldy
Memlekettik qyzmet isteri agenttiginiń bastamasymen aýyldyq okrýg ákimderi arasynda «Úzdik aýyl ákimi» respýblıkalyq konkýrsy ótkizildi. Konkýrstyń maqsaty - úzdik aýyl ákimderin anyqtaý jáne nasıhattaý.
Kezdesý barysynda agenttik tóraǵasy úzdik aýyl ákimderin óz qyzmetinde halyqtyń suranysyna saı ashyq, adal ári ádil bolý mańyzdylyǵyna toqtalyp, atalǵan baıqaýdyń aýyldardy damytýǵa jáne de osy baǵyttaǵy jumystardy jandandyrýǵa oń septigin tıgizetindigine senim bildirdi.
Óz kezeginde, aýyl ákimderine Prezıdent janyndaǵy Memlekettik basqarý akademııasynda kóshbasshylyq, sóz sóıleý, daǵdarystyq kommýnıkatsııa jáne t.b. daǵdylaryn shyńdaýǵa arnalǵan arnaıy trenıngter ótkizildi.
Atap ótý kerek, konkýrsqa qatysý úshin elimizdiń túkpir-túkpirinen júzge jýyq aýyldyq okrýg ákimderi ótinim berdi. Oblystardyń arasynda Qostanaıdan - 14 ákim, Soltústik Qazaqstannan - 12 , Jambyl oblysynan 12 ákim konkýrsqa ótinim berip, belsendilik tanytty.
Baıqaý eki kezeńde ótkizildi: óńirlik jáne respýblıkalyq.
Óńirlik kezeńge qatysýshylar aýyldyq jerlerde halyqtyń ómir súrý jaǵdaılaryn jaqsartýǵa baǵyttalǵan jobalardy qorǵap, ekonomıkalyq jáne áleýmettik áseri bar aýyldy damytý jóninde usynystar engizdi. Ekinshi kezeńde aýyl ákimderiniń problemalyq jaǵdaılar boıynsha sıtýatsııalyq keısterdi sheshý qabiletine baǵa berildi.
Konkýrs qorytyndysy boıynsha Túrkistan oblysy Shardara aýdany Jaýshyqum aýyldyq okrýginiń ákimi Nurseıtov Nurbaqyt Dáýletbekuly «Úzdik aýyl ákimi» ataǵyn ıelendi.
Ekinshi oryndy Pavlodar oblysy Ýspen aýdany Novopokrovsk aýyldyq okrýginiń ákimi Vıacheslav Nıkolaevıch Sımonenko, úshinshi oryndy Aqtóbe oblysy Shalqar aýdany Aıshýaq aýyldyq okrýginiń ákimi Oralbek Ábshanuly Ábshanov ıe boldy.
Sondaı-aq Shyǵys-Qazaqstan oblysy Ulan aýdany Ablaket aýyldyq okrýginiń ákimi Aglanbekov Aryslan Orynbasarovıch – «Úzdik sharýashyl ákim», Qaraǵandy oblysy Nura aýdany Barshyn aýyldyq okrýginiń ákimi Mýhanalıeva Zaýre Kazanbaevna – «Ashyq ákim», Soltústik-Qazaqstan oblysy Aqqaıyń aýdany Shaǵalaly aýyldyq okrýginiń ákimi Dobromırova Gýlmıra Orazbaevna – «Úzdik áleýmettik joba» nomınatsııalarynyń ıegerleri atandy.
Baıqaý jeńimpazdary men nomınatsııa ıegerleri Memlekettik qyzmet isteri agenttigi tóraǵasynyń qurmet gramotasymen marapattaldy.