Úzdik 100 oqýlyqty túpnusqadan aýdarý jobasy eshbir elde joq - ShQMÝ rektory
«Qazaqstan Respýblıkasynyń Prezıdenti N.Á. Nazarbaevtyń qatysýymen Astana qalasynda ótken «Jańa gýmanıtarlyq bilim» atty jıynnan erekshe áser aldyq. Elbasy júktegen mindetterge sáıkes, «Qazaq tilindegi 100 jańa oqýlyq» jobasy gýmanıtarlyq baǵyttaǵy tarıh, saıasattaný, áleýmettaný, fılosofııa, psıhologııa, mádenıettaný jáne fılologııa ǵylymdary boıynsha stýdentterge tolyqqandy bilim berýge qajetti barlyq jaǵdaıdy jasaýǵa arnalyp otyr. Atalmysh joba nátıjesinde el jastary kósh sońynda qalmaı, qııadaǵyny qaǵyp túsetin alǵyr da bilimdi urpaqqa aınalmaq. Álemdegi úzdik kitaptardyń qazaq tiline aýdarylýy - óskeleń urpaqtyń bilim deńgeıin ári qaraı arttyrýǵa septigin tıgizetin memlekettiń erekshe qamqorlyǵy», - deıdi ol.
Sársen Amanjolov atyndaǵy ShQMÝ ǵalymdary bul ıgi iske ún qosý maqsatynda aldaǵy 5 jylda eldiń tarıhyna, kıeli mekenderge, Shyǵys Qazaqstan toponımıkasy men arheologııasyna arnalǵan 100 monografııany tartý etpek. Bıyldyń ózinde ýnıversıtette 30 monografııa jaryq kórýi tıis. Atalmysh bilim ordasy «Rýhanı jańǵyrý» baǵdarlamalyq maqalasynyń 1 jyldyǵyna oraı 14 monografııanyń tusaýyn kesip, oqyrmandardyń keń aýdıtorııasyna usynǵan.
«Qazaq tilindegi 100 jańa oqýlyq» jobasynyń eń negizgi ıdeıasy - qoǵamdy bir baǵytta uıystyryp, onyń yntymaǵyn arttyrý. Eshbir elde túpnusqadan óziniń tól tiline 100 úzdik oqýlyqty aýdarý jobasy joq. Árıne, «Bolashaqqa baǵdar: rýhanı jańǵyrý» maqalasy arqyly Elbasy bergen tapsyrmalardy oryndaı otyryp, biz damyǵan 30 eldiń qataryna, shıkizatqa negizdelgen elden ıntellektýaldyq áleýeti damyǵan memleket retinde enetin bolamyz. Óıtkeni, bilimi damyǵan el ǵana órkenıetke jetedi», - deıdi rektor.
Foto: vkgu.kz