Uzaq jasaýdyń syry eńbek pen jan tynyshtyǵynda — 114 jastaǵy keıýana
114 jastaǵy Túımegúl Temirbaeva 1910 jyly 1 qańtarda Jambyl oblysy Baıqadam aýdanynda dúnıege kelgen. 22 jasynda Aıazbaı Temirbaevqa turmysqa shyqqannan beri 92 jyl boıy Ulytaý oblysynyń Jańaarqa aýdanynda turady.
Ǵasyr jasaǵan keıýana tórt balasynan 15 nemere men 25 shóbere súıgen. Ájeniń úlken balasy zeınetke shyǵyp, 70-ke jetip qalǵan, al kenjesi 60 jasta.
Aıta ketý kerek, Túımegúl apanyń ómirlik joldasy da uzaq ǵumyr keshken. Otaǵasy 96 jasynda dúnıeden ozǵan.
«Jubaıymmen uzaq ári baqytty ómir súrdik. Tórt bala tárbıeledik. Qazir balalarymnyń, nemere-shóberelerimniń ortasynda, solardyń qyzyǵyn kórip otyrmyn. Balalarym árdaıym meni qýantyp, qamqor bolyp júredi. Múmkin uzaq ómir súrýimniń bir qupııasy osynda shyǵar», — deıdi Túımegúl Temirbaeva.
Ájeıdiń aıtýynsha, uzaq ǵumyr keshýdiń taǵy bir basty qupııasy — eńbekte, jan tynyshtyǵynda. Qarııanyń ómir jolynda qandaı qıyndyqtar bolmasyn, bárin tabandylyqpen jáne eńsesin túsirmeı jeńe bilgen.
«Otbasymyzda úsh bala birge eseıdik. Ata-anam jylqyshy bolatyn. Esimdi bilgeli ómirim jylqylarmen birge ótip keledi. Bıe saýyp, qymyz ashyttym, úı sharýasyna kómektestim. Nebári úsh jasymda anamnan aıyrylyp, jetim qaldym. Sondyqtan úı sharýasyn erte jastan bastap úırenýge týra keldi. Turmys qurǵannan keıin de jubaıyma kómekshi, demeý boldym. Eshqashan aýyr jumystan qashqan emespin. Jas kezimde jylqylarǵa sýdy shelekpen tasydyq. Bıe saýyp, júzdegen lıtr sút tapsyrdyq. Menińshe, uzaq ómir súrýdiń taǵy bir qupııasy — árqashan atqa mingendi unatqanymda dep oılaımyn. Qartaıǵansha erden túsken joqpyn. Jumystyń basym bóligi at ústinde atqaryldy», — deıdi Túımegúl apa.
Ájeı qazir de qol qýsyryp otyrmaıdy. Nemereleriniń aıtýynsha, ol áli de úı sharýasyna kómektesip kúıbeńdep júredi. Bári ájesin úlgi tutady jáne olardyń otbasynda uzaq jasaıtyndar áli de az bolmaıtynyna senimdi.
Buǵan deıin Túımegúl ájeı Jibek Joly efırinde qazaqstandyqtarǵa batasyn bergen bolatyn.
Eńbek mınıstrliginiń málimetinshe, Qazaqstanda júzden asqan 423 adam turady.
«Aıta ketý kerek, eldiń ońtústik aımaǵynda júz jasaǵandar kóbirek. Túrkistan oblysynda 100-den asqan 64 adam bar. Uzaq ómir súretinder sany boıynsha ekinshi orynda elimizdiń eń iri qalasy — Almaty ornalaqan. Onda 100 jastan asqan 48 adam turady. Ǵasyr keshkender sany boıynsha úshinshi orynda Almaty oblysy tur, onda 100 jáne odan joǵary jastaǵy 38 adam turady. Eń qart Qazaqstandyqtardyń úshtigine Ulytaý oblysynyń turǵyny — 114 jas, Pavlodar oblysynyń turǵyny — 112 jas jáne 110 jastaǵy qarııa turatyn Túrkistan oblysy kirdi», — delingen Eńbek mınıstrliginiń habarlamasynda.
Esterińizge sala keteıik, 1 qazanda búkil álemde Halyqaralyq qarttar kúni atalyp ótedi. Bul mereke 1990 jyly 14 jeltoqsanda Birikken Ulttar Uıymy Bas Assambleıasynyń 45 sessııasynda jarııalandy.
Qazaqstan BUU standarty boıynsha qartaıǵan elder qataryna kiredi.