Úılestirý keńesiniń otyrysynda Qylmystyq, Qylmystyq-protsestik jáne Ákimshilik quqyq buzýshylyqtar týraly kodeksterge engiziletin túzetýler talqylandy
Jınalys jumysyna Úılestirý keńesiniń músheleri, Prezıdent Ákimshiliginiń jaýapty qyzmetkerleri, birqatar quqyq qorǵaý, arnaıy jáne ózge de memlekettik organdardyń basshylary, sondaı-aq ǵylymı ortanyń ókilderi qatysty, dep habarlaıdyBas prokýratýranyń baspasóz qyzmeti.
Ótken jyldyń basynan beri quqyq qorǵaý júıesi jańa qylmystyq, qylmystyq-protsestik jáne ákimshilik zańnama sheńberinde qyzmet etýde. Jańa jaǵdaılarda jumys isteýge tıimdi jáne yńǵaıly kóshý boıynsha barynsha qajetti sharalar qabyldandy.
Bas Prokýror atap ótkendeı, sotqa deıingi óndiristiń jańa modeli tájirıbede óziniń tıimdiligin kórsetti, protseske qatysýshylardyń quqyqtary men múddelerin qorǵaýdy kúsheıtýge septigin tıgizdi. Sonymen qatar, zańnamalyq jańashyldyqtardy engizý quqyq qoldanýshylyq tájirıbeniń jekelegen suraqtarymen qatar júrdi. Sondyqtan jańa kodeksterdi qoldaný tájirıbesine monıtorıng jáne taldaý jasaý maqsatynda Bas prokýratýranyń jetekshiligimen vedomstvoaralyq jumysshy toby qurylǵan bolatyn. Búginde top Qylmystyq, Qylmystyq-protsestik jáne Ákimshilik quqyq buzýshylyqtar týraly kodeksterge engizýge sáıkes túzetýler ázirledi.
Úılestirý keńesiniń músheleri júrgizilgen jumystardyń nátıjelerin egjeı-tegjeıli talqylap, qylmystyq protsesti odan ári jetildirý jáne sotqa deıingi óndiristi qarapaıym etýge baǵyttalǵan usynystardy taldady.
Vedomstvoaralyq jumysshy tobyna osy baǵyttaǵy jumystardy jalǵastyrý usynyldy. Jıynda aıtylǵan usynystar men eskertýlerdi qorytyndylap, top jınalysynda talqylaý qajet. Olardyń negizinde ázirlenetin zańnamaǵa engizilýi tıis túzetýler barlyq múddeli organdardyń pikirlerin esepke ala otyryp Prezıdent Ákimshiligine joldanatyn bolady.