Úıinde 3 keli mefedron saqtaǵan astanalyq erli-zaıyptylar ustaldy

ASTANA. QazAqparat – 1 maýsym-31 qazan aralyǵynda ótken «Qarasora – 2022» aldyn alý sharasy sheńberinde esirtki satýdyń 60 faktisi tirkeldi. Bul týraly Astananyń esirtki qylmysyna qarsy is-qımyl basqarmasynyń bólim bastyǵy Sergeı Ilınyh aıtyp berdi, dep habarlaıdy QazAqparat tilshisi.

«Bıylǵy maýsym aıynda esirtkini asa iri mólsherde saqtaýmen jáne ótkizýmen aınalysqan elorda turǵyny ustaldy. Ustalǵan adamnyń garajyn tintý kezinde jalpy salmaǵy 40 kelige jýyq marıhýana tárkilendi», - dedi Sergeı Ilınyh «Esil» aýdandyq polıtsııa basqarmasynda ótken brıfıngte.

Spıkerdiń aıtýynsha, qazir sıntetıkalyq esirtkiniń zańsyz aınalymy máselesi ózekti bolyp otyr.

«Bıyl 27 shildede Astana qalasy polıtsııa departamentiniń qyzmetkerleri Momyshuly dańǵylynda turatyn erli-zaıyptyny ustady jáne olardan jalpy salmaǵy 3 keli mefedron tárkilendi. Esirtki óndiretin bir fıtolaboratorııanyń qyzmeti toqtatyldy. Osylaısha, 20 maýsymda turǵyn úıdiń jertólesinde qarasora ósirgen 2 azamat ustalyp, 6 kelige jýyq marıhýana tárkilendi», - dedi S. Ilınyh.

Aıta keteıik, elordada «Qarasora-2022» jedel aldyn alý sharasy kezinde esirtkige qatysty 358 quqyqbuzýshylyq tirkeldi.

130 kelige jýyq túrli esirtki, onyń ishinde 54 keli marıhýana, 61 keli gashısh jáne 14 kelige jýyq sıntetıkalyq esirtki zańsyz aınalymnan shyǵaryldy.