Úıimizde barlyǵy qazaqsha sóıleıdi - qaraǵandylyq ustaz

QARAǴANDY. QazAqparat – Qaraǵandy oblysynda 100-den astam ult ókili turady. Olardyń arasynda qazaq tilinde taza sóılep, tipti memlekettik tilde sabaq beretinderi de bar, dep habarlaıdy QazAqparat tilshisi.

Svetlana Krýment Qaraǵandy qalasynyń Táttimbet atyndaǵy óner kolledjinde tarıh páninen qazaq tilinde sabaq beredi. Ustazdyń ustanymy myqty. Halqymyzdyń aýyz ádebıeti, salt-dástúri, ádet-ǵurpyn dáripteýdi stýdentter sanasyna sińirip keledi.

«Kóbinese ınnovatsııalyq tehnologııalardy qoldanamyz. Óıtkeni, bul tásil balalarǵa jaqyn. Olar telefon, noýtbýk sekildi túrli gadjettermen jumys isteýge úırenip qalǵan. Sondyqtan, balalarǵa barlyǵy túsinikti bolýy úshin solardy qoldanamyz. Sonymen qatar, oıyn túrinde de sabaq ótkizemiz», - deıdi Svetlana Krýment.

Svetlana Fadısovna Qarqaraly aýdanynyń týmasy. Keıipkerimizdiń ákesi – tatar, anasy – orys. Mektepte, ýnıversıtette orys bóliminde oqyǵan. Alaıda, memlekettik tilge ana tilinen kem qaraǵan emes.

«Negizi meniń tilim eki tilde shyqqan. Áke-sheshemniń aıtýynsha, men kishkentaıymnan qazaq jáne orys tilin qatar alyp júrgen ekenmin. Úıimizde barlyǵy qazaqsha sóıleı alady», - deıdi ol.

Qazir Svetlana Krýment – nemis ultynyń kelini. Qonaq kútýge beıim. Uıasynda kórgen tárbıesi sondaı. Qonaq – qut, rızyq, berekesin ala keledi dep paıymdaıdy. Dastarhanynyń basty asy – et.

«Joldasymnyń jaqsy kóretin taǵamy – et. Ulty nemis bolsa da, basqa da túrli taǵamdardy daıyndap otyrsaq ta, árdaıym et – bizdiń otbasymyzda dastarhanymyzdyń negizgi asy», - deıdi ol.

Sonymen birge, qazaq yrymyna senedi jáne ony rýhanı tegine jaqyn ustaǵysy keledi. Uly dúnıege kelgen sátten bastap, qazaq dástúrine sáıkes barlyq jón-joralǵyny jasap keledi.