Úıge gaz jelilerin tartý jumystary monopolııalanǵan - agenttik

NUR-SULTAN. QazAqparat – QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov gazdyń jelilerin tartý kezinde qurylys-montajdaý jumystary naryǵynda básekelestik shektelip kelgenin aıtty, dep habarlaıdy QazAqparat tilshisi.

«Básekelestik pen teń qoljetimdiliktiń eleýli shekteýleri «úıishilik» jelilerdi salý kezinde qurylys-montajdaý jumystary naryǵynda bar.

250-den astam qyzmet kórsetýshilerdiń ishinde «Gaz Qurylys» JShS negizgi oıynshysyna naryqtyń 70%-y tıesili boldy. Bul rette, qosalqy merdigerlerge jergilikti naryq sýbektileri tartyldy ne básekelesterdiń baǵasynan 15-20%-ǵa joǵary baǵalar boıynsha óz betinshe qyzmetter kórsetildi», - dedi R. Ahmetov Ortalyq kommýnıkatsııalar qyzmetinde.

Ol úshin «QazTransGaz Aımaq» AQ ofısterinde bolý, sondaı-aq qosylýǵa ótinimderdi basym qaraý sııaqty birqatar artyqshylyqtar jasaldy.

«Osylaısha, áleýetti básekege qabiletti naryqtar monopolııalanǵan», - dedi agenttik ókili.

Budan buryn habarlanǵandaı, Básekelestikti qorǵaý agenttigi basshylyǵy gaz naryǵyndaǵy kemshilikterdi atady.

Rýstam Ahmetov taýarlyq gazdy bólshek saýdada ótkizý naryǵynda monopolııasyzdandyrý protsesi bastalǵanyn aıtty.