Úıge gaz tartý nege qymbat – astana ákimdigi turǵyndar shaǵymyna jaýap berdi

NUR-SULTAN. QazAqparat – Elimizdiń barlyq óńirinde úıge gaz tartý quny birdeı. Bul týraly Nur-Sultan qalalyq otyn-energetıkalyq kesheni jáne kommýnaldyq sharýashylyq basqarmasy otyn-energetıkalyq resýrstar bóliminiń basshysy Maqsat Esmaǵulov aıtty, dep habarlaıdy QazAqparat tilshisi.

«Ákimdik pen «QazTransGaz» jobasynda jelilerdi árbir úıdiń qorshaýyna deıin jetkizip, jer betine shyǵarý, ıaǵnı qosý núktesin qaldyrý qarastyrylǵan. Odan ári turǵyn gazben jabdyqtaý týraly zańnamaǵa sáıkes naryq tártibinde akkredıttelgen jeke kompanııany jaldaıdy», - dedi Maqsat Esmaǵulov elorda ákimdiginde ótken baspasóz máslıhatynda BAQ ókilderiniń saýalyna oraı.

Onyń atap ótýinshe, gazdy qosý quny men sharty naryqtyq bolyp sanalady jáne eshqandaı memlekettik organ bul qyzmetti rettemeıdi.

«Turǵyn kompanııany ózi tańdaıdy jáne onymen kelisedi. Qosý qunyna qatysty kóp shaǵym boldy. Biraq, bul tek astanaǵa ǵana tán emes ekenin atap ótkim keledi. Qazaqstannyń barlyq óńirinde osyndaı jaıt. Máselen, Batys Qazaqstan oblysynda nemese Jambyl oblysynda, ne bolmasa elorda gaz qostyrsańyz da, shamamen quny birdeı bolady», - dep túsindirdi ol.

Buǵan deıin buqaralyq aqparat quraldarynda aýdany 160 sharshy metr bolatyn jeke úıge 30 metrlik gaz qubyryn tartý, jeldetý qurylǵysyn ornatý jáne basqa da jumystarda qosa alǵanda 755 892 myń teńge bolatyndyǵy habarlanǵan edi.

Foto: vesti.ua