Úıdiń qujattary daıyn bolmasa tirkeýge qalaı turǵyzady

ASTANA. QazAqparat - Biz úıdiń qujattaryn áli alǵan joqpyz. Halyqqa qyzmet kórsetý ortalyǵyna barsaq, tirkeýge qoıa almaımyz deıdi. Endi, tirkeýge qalaı turýǵa bolady? 

QazAqparat agenttiginiń Aıan esimdi oqyrmany osyndaı suraq joldady. Oǵan Astana qalalyq ishki ister departamenti kóshi-qon basqarmasynyń basshysy Gúlvıra Dónenbaeva jaýap berdi.

"Eger úıdiń qujattary bolmasa, biz tirkeýge qoıa almaımyz. Bul - zańnyń talaby. Biz tıisti erejeden attaı almaımyz. Biraq úıdiń qujattary daıyn bolmasa, jumys orny boıynsha tirkeýge turýǵa bolady. Ol úshin jumys berýshiniń ótinish xaty kerek. Sonyń negizinde ýaqytsha tirkeýge turýǵa múmkindik bar. Áıtpese, jaqyn týystardyń úıinde tirkelse de bolady. Al úıdiń qujattary rásimdelgennen keıin óz úıińizge aýyssańyz bolady", - dedi G.Dónenbaeva QazAqparat tilshisine bergen suxbatynda.

Aıta keteıik, qańtardyń 7-si kúni kúshine engen zańnamaǵa sáıkes, ýaqytsha tirkelmegeni úshin ákimshilik jaza, ıaǵnı aıyppul salý sharasy engizilgen bolatyn. Bir aıdyń ishinde tek túsindirý men eskertý jumystary júrgiziledi. Al aqpannyń 7-sinen bastap turaqty jáne ýaqytsha tirkeýge turmaǵan azamattarǵa aıyppul salynady.