Úıdi tıimdi basqara bilý de - óner

ASTANA. QazAqparat - Kóptegen qalalyq turǵyndar kópqabatty turǵyn úılerdi meken etedi. Sońǵy jyldary sol turǵyn úılerdi basqarý isine orasan zor jańalyqtar engizilýde. Ádette biz páter ıeleri kooperatıvterine (KSK) senim artyp úırengen edik, degenmen, qazirgi kezde úıimizdi basqarýdy, kútip ustaýdy jeke kompanııalar qolǵa aldy. Olar turǵyn úı keshenine tolyqtaı qyzmet kórsetip, ondaǵy tazalyq pen ortaq múliktiń bútindigine jaýap beredi. Astana qalasyndaǵy osyndaı kompanııalardyń biri «Astana JılServıs NS» JShS jetekshisi Raýan Janǵalıevpen bolǵan suhbatymyzdy nazarlaryńyzǵa usynamyz.

- Eń áýeli PIK pen basqarýshy kompanııanyń aıyrmashylyqtaryna toqtalsaq.

- Birinshiden, PIK - kommertsııalyq uıym emes. Onyń jetekshisin turǵyndar ózderi saılap alady. PIK tabys tabýmen aınalyspaıdy. Al basqarýshy kompanııalar - turǵyndarǵa qyzmet kórsetý arqyly tabys tabatyn kommertsııalyq joba. Olar turǵyndardyń suranysyn qanaǵattandyrý úshin, naqty bir nátıje úshin jumys isteıdi, tıisti jaǵdaıdy jasaıdy. Bizdi turǵyndar ózderi jaldap, kórsetken qyzmetimiz úshin aqy tóleıdi. Máselen, bank nemese basqa da uıymdardy basqarý úshin bireýdi jaldaıdy emes pe, sol sııaqty turǵyn úıdi de basqaratyn bir tulǵa bolýy tıis. Bizdiń qyzmetimiz sol, ıaǵnı, úı sharýashylyǵyn basqarý. Al endi óz kompanııama qatysty aıtar bolsam, o bastaǵy maqsatymyz bireý bolatyn. Aıtalyq, árbir adam issapardan nemese jaı ǵana jumystan keıin páterine jetkende «qaıran meniń óz úıim, keń saraıdaı boz úıim» dep ádemi bir sezimge bólenedi emes pe. Maqsatymyz - árbir turǵyn páterine emes, úıiniń aldyna kelip toqtaǵanda osyndaı sezimge bólense deımiz. Ár adamnyń jany jaı tabatyn jer óz aýlasynan bastalsa, odan artyq eshteńe kerek emes. Basqarýshy kompanııanyń arqasynda ár adam ózine tıesili páterdi ǵana emes, búkil úıdi óz menshigindeı jaqsy kóre alady.

- Sizderdiń qyzmetke tólenetin aqy PIK-ten qymbat bolar?

- Olaı deı almaımyn. Tipti PIK-ke tólenetin aqymen bir deńgeıde deýge bolady. Árıne, ár úıdiń jaǵdaıyna qaraı turǵyndar tóleıtin soma ártúrli bolyp shyǵady. Degenmen, orta eseppen alǵanda sharshy metrine 45-55 teńge.

- Kórsetiletin qyzmet túrleri qandaı?

- Biz qazirgi tańda Astana qalasy boıynsha 29 turǵyn úı keshenin óz qamqorlyǵymyzǵa alǵanbyz. Qyzmet túrleri 10-nan asyp jyǵylady. Onyń ishine úıdi jylý maýsymyna ázirleý; úı aınalasyn abattandyrý jáne kógerishtendirý; nasos stansalaryna, avtomatıkaǵa, KIP jáne A jylý jelisine, órt qaýipsizdigi quraldaryna, jylý energııasyn eseptegish jabdyqtarǵa servıstik qyzmet kórsetý; santehnıkalyq, elektr jáne plotnık qyzmetterin kórsetý, podezder men úı aınalasyn tazalaý, kógaldardy sýaryp, aǵashtardy ákteý; qar kúreý; elektr quraldaryn ornatý jáne kerek kezinde almastyryp otyrý; podezder men balalar oıyn alańyn aǵymdaǵy jáne kúrdeli jóndeýden ótkizý sııaqty qyzmetter kiredi. Sol 29 úıdiń ishinde búkil Astanaǵa maqtaýly keshender bar. Máselen, «Kógildir kvartal», «Aqbulaq Town», «Shahar», «Sımfonııa», «Sarmat», «Jyl mezgilderi-Kúz», «Dýet», «Nomad» jáne taǵy basqa turǵyn úılerdiń qaı-qaısysyna bolmasyn bas suqsańyz, aýlasynan bastap shatyryna deıin erekshe kútim men qamqorlyqty baıqaısyz. Bul - bizdiń eńbekqor mamandarymyzdyń jumysynyń jemisi. Maqtanysh emes, shyndyǵy sol. Kóz jetkizgińiz kelse, aralap qaıtýǵa bolady.

- Osy qyzmetterdi iske asyratyn mamandar jaıly aıtsańyz. 29 úıdi gúldeı jaınatyp otyrý úshin qansha adam mańdaı terin tógip júr?

- Jalpy búkil kompanııa shtatynda 200-den astam adam bar. Olar jyl saıyn kompanııanyń esebinen biliktilikterin arttyryp otyrady. Ár keshenge bekitilgen jaýapty adam bolady. Buryn olar úı basqarýshy (domoýprav) dep atalatyn. Qazir menedjer deımiz. Turǵyndar bar aryz-shaǵymyn, usynysyn osy kisilerge aıta alady. Tipti bolmasa, bizdiń arnaıy Call-ortalyq bar. Nómiri - 360-360. Soǵan habarlasyp, kez-kelgen ýaqytta qajetti mamandy shaqyrtýyna bolady. Sol call-ortalyq arqyly mamandar qyzmetine baǵa berýine de múmkindik jasalǵan. Taǵy bir aıta ketetin másele, «úıimizdi basqaryp berińiz» dep ótinish aıtyp keletin turǵyndar az emes. Halyq birinen biri estip, qyzyǵatyn bolsa kerek. Soǵan oraı úı ústine úı qosyp, birinen soń birin óz qamqorlyǵymyzǵa ala bersek te bolar edi. Kompanııa shtaty da ulǵaıa berer edi. Biraq biz eń áýeli qyzmet sapasyna erekshe mán beremiz. Birinshi kezekte óz qamqorlyǵymyzdaǵy úılerdiń jaǵdaıyn jaqsartyp, qyzmet sapasyn eń joǵary dárejege jetkizýdi kózdep otyrmyz. Sol úılerge qajetti tehnıkalyq jabdyqtardyń tek qana sapalysyn alýǵa, úı basqarýda qandaı da bir jańalyqtar, ınnovatsııalar paıda bolsa, birinshi bolyp engizýge qulshynyp turamyz.

- Degenmen, osy basqarýshy kompanııany jaldaý úrdisi qalaı júredi? Turǵyndar kelip ótinish aıtqannan keıingi sizderdiń áreket qandaı?

- Sol keshenniń turǵyndarymen kezdesip, óz qyzmetterimizben tanystyramyz. Talaptarymyzdy aıtamyz. Sol úıdiń jaǵdaıyn, páter sanyn, basqa da krıterıılerdi eskere kele tólenetin jalpy soma eseptep shyǵarylady. Eger sol úıdiń turǵyndarynyń úshten ekisi kelisimin berse, taǵy da jıyn ótkiziledi. Sosyn ekijaqty kelisimshart jasalady.

- Turǵyn úı keshenderiniń jaǵdaıy qandaı? Barlyǵy jańa úıler me?

- Joq, barlyǵy birdeı jańa emes. Sonaý 2000 jyldardyń basynda salynǵan, kónere bastaǵan úılerdi de jóndeýden ótkizip, ıne-jipten jańa shyqqandaı kelbet syıladyq. Máselen, «Nomad» turǵyn úı keshenin salǵan «BI Group» kompanııasy arada on shaqty jyl ótip ketkenine qaramastan úıdiń qasbetin, podezderdi qaıta jóndeýden ótkizip jatyr. Bul úshin kompanııa arnaıy aqy almaıdy. Jóndeý jumysynyń quny turǵyndardyń aı saıynǵy tóleıtin tólemaqysynyń ústine qosylýy múmkin. Onda da belgili bir merzimge, 30 paıyz kóleminde ǵana. Sonymen birge árbir turǵyn úı kesheniniń atyna zaty saı bolýy úshin kúsh salamyz. Máselen, «Nomad» kesheniniń podezderine aty aıtyp turǵandaı kóshpendiniń sýreti salynǵan. Dala kezgen erkin halyqtyń qýatty rýhy seziledi. «Jyl mezgilderi-Kúz» kesheniniń syrt beınesine qaraǵanda-aq kúzdiń jyly lebi eskendeı bolady. ıAǵnı turǵyn úı - ol tek sup-sur tas qabyrǵalar emes, ádemi kóńil kúı syılaıtyn janǵa jaıly shańyraq bolýǵa tıis.

- Áńgimeńizge raqmet.

Suhbattasqan Janat Qapalbaeva