Úıden shyqpańyz: TJD astanalyqtarǵa eskertý jasady

<p>ASTANA. KAZINFORM&nbsp;&mdash; Boran men jeldiń kúsheıýine baılanysty Astananyń tótenshe jaǵdaılar departamenti qala turǵyndaryna eskertý jasady. Atap aıtqanda, qalanyń syrtyna shyqpaı, saq bolýǵa, aýa raıyn qadaǵalap, shekteý týraly aqparatty qadaǵalap otyrýǵa shaqyrady.&nbsp;&nbsp;</p>

Qazgıdromet málimeti boıynsha, 9 aqpanda Astana qalasynda boran, kóktaıǵaq bolady. Ońtústik-batystan, batystan soqqan jeldiń ekpini 23-28 m/s jetedi.

8 aqpan keshke, túnde jáne 9 aqpan tańerteń jel qarqyny 30 m/s asady. 

8 aqpan saǵat 18.00-degi jaǵdaı boıynsha Astana qalasynan shyǵatyn barlyq joldar jabylǵan.  

«Daýyl kezinde eń aldymen, elektr jelileri men jabdyqtardyń, turǵyn úıdegi jylytý peshiniń jaı-kúıin tekserý, ishki jáne syrtqy órtke qarsy sýmen jabdyqtaýdyń, telefon baılanysynyń jaramdylyǵyn qamtamasyz etý, órtke qarsy quraldardy daıyndaý qajet. Páterdegi elektr jelisiniń kerneýi joǵarylaǵan kezde búkil turmystyq tehnıkany dereý rozetkadan ajyratyńyz. Siz joqta kenetten elektr qýaty qosýly kezde órt tutanbas úshin rozetkany óshirińiz. Sondaı-aq, jeke kólikti aǵashtar men eski ǵımarattardan aýlaqqa qoıyńyz. Úıdegi búkil terezelerdi myqtap japqan jón. Eger kóshede qatty jel soqsa, qaýipsiz úı-jaıdy panalańyz. Balalardy syrtqa shyǵarmaýǵa tyrysyńyz jáne múmkindiginshe ózińiz de shyqpańyz. Eger mundaı qajettilik týyndasa, týystaryńyzǵa nemese kórshilerińizge qaıda bara jatqanyńyzdy jáne qashan oralǵanyńyzdy aıtyńyz. Jalǵyz shyqpaýǵa tyrysyńyz» dep keńes beredi qutqarýshylar.   

Sondaı-aq elorda turǵyndary jolda abaı bolyp, qaýipsizdik erejelerin saqtaýy, alys saparlardan bas tartqany durys. 

Tótenshe jaǵdaı týyndaǵan kezde «112» telefonyna habarlasyńyz.

Aıta keteıik, erteń Astanada 0-11 synyp oqýshylary mektepke barmaıdy. Sabaqty qashyqtan oqıdy.