Úıden nan pisirip satatyn qazaqstandyqtar 8,7 mlrd teńge paıda tapqan

NUR-SULTAN. QazAqparat – Bıylǵy jyldyń birinshi toqsanynda elimizdegi úı sharýashylyqtary 29,9 mlrd teńge somasyna ónim óndirgen. Bul ótken jyldyń sáıkes kezeńimen salystyrǵanda 3,1 paıyzǵa kóp, dep habarlaıdy QazAqparat tilshisi Energyprom.kz-ke silteme jasap.

Energyprom.kz aqparaty boıynsha, qazaqstandyqtar kóbine úıden nan pisirip satýmen aınalysady. Máselen, bıylǵy úsh aıda elimizdiń úı sharýashylyqtarynyń nan satýdan tapqan paıdasy 8,7 mlrd teńgeni quraǵan. Bul ótken jylmen salystyrǵanda 6,2 paıyzǵa kóp.

Sondaı-aq toqash jáne unnan jasalatyn ózge de kondıterlik ónimderdi úıden pisirip satatýdan túsken qarajat 6,9 paıyzǵa artyp, 8 mlrd teńgeni qurady.

Bul oraıda, ónimderdi kóbine Almaty oblysynda ornalasqan úı sharýashylyqtary óndirgen. Olar bıyl óz ónimderin 6,2 mlrd teńgege ótkizgen. Atalǵan baǵytta kirisi kóp óńirlerdiń úshtigine Túrkistan (6 mln teńge, ósim 3,5%) jáne Pavlodar (5,3 mln teńge, ósim 18,5%) oblystary kirdi. Al jeke ónim óndirý kólemi eń az ónir – Mańǵystaý oblysy.

Qazaqstandyqtardyń jeke ónim jasaý salasyndaǵy kirisi artqanmen, oǵan jumsalatyn shyǵyndar da ósken. Atap aıtqanda, azamattar úsh aıda 29,9 mlrd teńge paıda tapsa, onyń 14,7 mlrd teńgesi shyǵyndarǵa jumsalǵan.