Úıden daýys beretin saılaýshylarǵa barǵan komıssııa músheleri qorǵanysh kıimin paıdalandy

AQTÓBE. QazAqparat – Aqtóbe oblysy Alǵa aýdanynda eki aýyldyń ákimi saılanyp jatyr. Turǵyndardyń 70% jýyǵy óz tańdaýyn jasady. Aýmaqtyq saılaý komıssııasynyń tóraıymy Aqmaral Nurmaǵambetova QazAqparat tilshisine saıası naýqannyń qalaı ótip jatqanyn aıtyp berdi.

Alǵa aýdany boıynsha Úshqudyq jáne Toqmansaı aýyldyq okrýgterinde ákim saılanyp jatyr. Ár okrýgte eki saılaý ýchaskesi, barlyǵy 1768 saılaýshy bar.

«Saılaý ýchaskeleri ýaqytyly ashyldy. Ár saılaý ýchaskesinde kandıdattardyń senim bildirgen adamdary men baıqaýshylar bar. Aýylda jasy úlken adamdar óte belsendi. Olar tańerteń erte turyp, tańdaýyn jasady. Qazirgi kezde Alǵa aýdany boıynsha saılaýshylardyń 70 paıyzǵa jýyǵy daýys berip úlgerdi»,- dedi Aýmaqtyq saılaý komıssııasynyń tóraıymy Aqmaral Nurmaǵambetova.

Úshqudyq aýyldyq okrýgine qarasty Aqsazdy aýylyna saılaý komıssııasynyń músheleri arnaıy bardy. Mundaǵy ár otbasynyń eki adamy óz tańdaýyn jasady.

«Munda daýys berýge quqyǵy bar 51 adam turady. Bári de tańdaýyn jasady. Tasymaldaý jáshigin aparǵan komıssııa múshelerine qorǵanysh quraly, arnaıy kıim berildi. Sonymen birge ýchaskelerde epıdemıologııalyq jaǵdaı eskerilip, komıssııa músheleri men saılaýshylardy bólip turatyn áınek ornatyldy. Maska taǵý, kireberiste dene qyzýyn ólsheý mindetteldi», - dedi Aqmaral Nurmaǵambetova.

Sondaı-aq osy eki aýyldyq okrýg boıynsha múmkindigi shekteýli úsh jan óz tańdaýyn jasaýǵa ótinish bergen.

«Biriniń estý, ekinshisiniń kórý qabileti nashar. Biri sal aýrýyna shaldyqqan. Ekeýi úıde otyryp, daýys berdi. Al kórý qabileti nashar adamnyń saılaý ýchaskesine baryp daýys berýine jaǵdaı jasalǵan. Toqmansaı aýylynda arnaıy burysh bar. Aýdıo jazba arqyly kandıdattar týraly aqparat ala alady. Bıýlletenge belgi qoıý úshin trafaretti qoldanady», - dedi Aqmaral Nurmaǵambetova.