Úıde arnaýly áleýmettik qyzmet alatyndardyń tizbesi keńeıtildi - Eńbek mınıstrligi

NUR-SULTAN. QazAqparat - Qazaqstanda jalǵyzbasty zeınetkerlerge ǵana emes, sondaı-aq jaqyn týystarynyń kómeginsiz qalǵan, otbasy ishindegi janjalǵa baılanysty qıyn jaǵdaıda júrgen qart adamdarǵa da arnaýly áleýmettik qyzmetter endi úıde kórsetiletin bolady. Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.

Tıisti ózgerister «Arnaýly áleýmettik qyzmetter kórsetetin uıymdar qyzmetiniń qaǵıdalaryn bekitý týraly» Qazaqstan Respýblıkasy Eńbek jáne halyqty áleýmettik qorǵaý mınıstriniń 2018 jylǵy 29 tamyzdaǵy № 379 buıryǵyna ózgerister men tolyqtyrýlar engizý týraly» Qazaqstan Respýblıkasy Eńbek jáne halyqty áleýmettik qorǵaý mınıstriniń buıryǵynda kózdelgen.

Joǵaryda atalǵan normany Bala quqyqtary jónindegi ýákil Arýjan Saın, Parlament Májilisiniń depýtattary, belgili qoǵam qaıratkerleri, ÚEU jáne JAO ókilderi usyndy.

Sondaı-aq, barlyq medıtsınalyq-áleýmettik mekemelerde beınebaqylaý kameralaryn mindetti túrde ornatýdy qarastyratyn ózgerister engizildi. Kameralar uıymǵa irgeles jatqan aýmaqtyń alańy boıynsha, negizgi jáne qosalqy kireberisterdiń janynda, sondaı-aq úı-jaılar men ortaq paıdalanylatyn kabınetterde ornatylady. MÁM-degi týystary men jaqyn adamdarynyń jazbalardy kórýge ruqsaty bolady.

Budan basqa, qujat qajet bolǵan jaǵdaıda medıtsınalyq-áleýmettik mekemelerde turatyn barlyq adamdardyń ınternetke qol jetkizýin qamtamasyz etýdi retteıdi.

Aıta ketý kerek, halyqty áleýmettik qorǵaý júıesinde 23 myńnan astam adamdy qamtıtyn statsıonarlyq úlgidegi 113 MÁM jumys isteıdi.

Sonymen qatar, qajet bolǵan jaǵdaıda qar, kúl shyǵarý, kómirdi qazandyqtarǵa jetkizý jáne basqa da maýsymdyq jumystardy oryndaý maqsatynda «traktor» pozıtsııasyn qosa otyryp, statsıonarlyq úlgidegi MÁM avtokólik quraldarynyń lımıtin keńeıtý kózdeledi. Bul kólik quralynyń bolýy aýyldyq eldi mekenderde ornalasqan MÁM úshin qajet.

Joǵaryda atalǵan salalyq buıryq jergilikti atqarýshy organdar men qoǵamdyq birlestikterden arnaýly áleýmettik qyzmetter kórsetý salasyndaǵy NQA-ǵa ózgerister engizý boıynsha 150-ge jýyq usynys jınalyp, taldanǵannan keıin ázirlengen.