«Uıaly telefonnyń bedeýlikke áseri bar ma?» - baspasózge sholý
***
«Keshe Memleket basshysy Nursultan Nazarbaev Qazaqstanǵa resmı saparmen kelgen Mysyr Arab Respýblıkasynyń Prezıdenti Ábdel Fattah As-Sısımen kezdesti. Qazaqstan men Mysyr arasynda saýda-ekonomıkalyq baılanys bekip, aýyl sharýashylyǵy, farmatsevtıka, ǵarysh, ınfraqurylym jáne kólik-logıstıka salalaryndaǵy yntymaqtastyq artatyn boldy.
Mysyr Arab Respýblıkasynyń Prezıdenti Á.As-Sısıdiń Qazaqstanǵa sapary aıasynda osy máseleler keńinen talqylanyp, kelisimderge qol qoıyldy», - dep jazady «Egemen Qazaqstan» gazeti. Basylymnyń jazýynsha, kelissózderden soń Mysyr Arab Respýblıkasy Prezıdenti Ábdel Fattah As-Sısıdiń Qazaqstanǵa resmı sapary aıasynda memleketter basshylarynyń birlesken málimdemesi qabyldandy.
Sondaı-aq, birqatar qujattarǵa, atap aıtqanda, Mysyr Arab Respýblıkasynyń Astanadaǵy EKSPO-2017 halyqaralyq kórmesine qatysý shartyna, Azyq-túlik qaýipsizdigi jónindegi ıslam uıymynyń jarǵysyna qol qoıyldy. Qol qoıý rásiminen soń Qazaqstan Prezıdenti men Mysyr Prezıdenti kelissózder qorytyndysy boıynsha birlesken baspasóz máslıhatyn ótkizdi.
Qazaqstan Prezıdenti óz kezeginde Á.As-Sısıdiń el Táýelsizdiginiń 25 jyldyǵy belesinde kelýiniń máni zor ekenine nazar aýdardy. «Mysyr bizdiń egemendigimizdi arab elderiniń arasynan birinshi bolyp tanydy. Birinshi bolyp Qazaqstanda óz elshiligin ashty. Biz de arab memleketterindegi alǵashqy elshiligimizdi Kaırde ashqanbyz. Mysyr - san ǵasyr boıy ǵylym men bilim ortalyǵy, órkenıetter besigi bolǵan qasıetti jer. Azııa, Afrıka jáne Eýropany túıistirgen Perǵaýyndar eli arab-musylman álemindegi jetekshi memleketterdiń biri. Keıingi qıyndyqtarǵa qaramastan, Siz bılikke kelgeli jaǵdaı turaqtala bastaǵanyn baıqap otyrmyz.
Biz Mysyr eliniń ishki turaqtylyǵy berik, ekonomıkasy qýatty memleket bolýyna tilektespiz», - dedi Memleket basshysy.
Maqala «Qazaqstan-Mysyr: Ekonomıkalyq yntymaqtastyqtaǵy elder» degen taqyryppen berilgen.
Keshe elordada Qazaqstan Respýblıkasynyń Memlekettik hatshysy Gúlshara Ábdiqalyqovanyń qatysýymen Qazaqstan halqy Assambleıasy Keńesiniń otyrysy ótip, onda úsh másele qaraldy. Kún tártibinde Assambleıanyń «Úlken el úlken otbasy» jalpyulttyq jobasynyń iske asyrylýy barysy tyńdalyp, Parlament Májilisiniń V shaqyrylymyndaǵy QHA depýtattyq tobynyń jumysy qorytyndylandy. Sondaı-aq, Keńes depýtattyqqa kandıdattar tizimin maquldady. Dál osy jaıt arqaý bolǵan maqala el gazeti «Egemen Qazaqstanda» «Dostyq dástúrleri damytylady» degen taqyryppen berilgen. G.Ábdiqalyqova barlyq ortalyq memlekettik jáne jergilikti atqarýshy organdar Memleket basshysyna «Máńgilik El» ıdeıasynyń, sondaı-aq, Qazaqstan halqynyń forýmynda jáne bıylǵy sáýirde ótetin QHA-nyń XXIV sessııasynda usynylatyn Qazaqstandyq biregeılik pen birtektilikti nyǵaıtý jáne damytý tujyrymdamasynyń iske asyrylýy jóninde esep berýge kirisip ketkenin qaperge saldy. Al Mádenıet jáne sport mınıstri Arystan Muhamedıuly óz sózinde mınıstrlik 19 normatıvtik-quqyqtyq akt men jobalardy iske asyrýda ekenin, olardy ázirleý barysynda Ekonomıkalyq yntymaqtastyq jáne damý uıymy elderiniń standarttary men múshe elder tájirıbeleri eskerilgenin jetkizdi. Sondaı-aq, elimizdegi biregeılik pen birtektilikti nyǵaıtý úshin «Úlken el úlken otbasy» jalpyulttyq jobasynyń aıasynda kóptegen is-sharalar atqarylǵanyna nazar aýdardy.
***
Uıaly telefon bedeýliktiń de basty sebebi eken. Bul jaıynda «Ekspress K» gazetindegi «Mobıla do ımpotentsıı dovpedet» degen taqyryptaǵy maqalada aıtylǵan. Basylymnyń jazýynsha, Izraıl ǵalymdarynyń dáleldeýinshe, qolynan uıaly telefon túspeı er-azamattardyń atalyq uryqtarynyń sany kemip, qozǵalý belsendili baıaýlaıdy eken.
«Uıaly telefondy pıdalanýdyń belgili bir aspektileri atalyq uryq kontsentratsııasyna keri áserin tıgizýi múmkin», - deıdi ızraıldyq ǵalymdar.
***
«Otandyq bıznesmender Shý alqabynda jaıqalyp turǵan soradan arqan, mata, dári-dármek, kıim-keshek, jalpy kóptegen zattar shyǵarýdy armandaǵany belgili. Endi bul zattardyń qataryn kádimgi qaǵaz toltyryp otyr», - dep jazady «Ekspress K» gazeti «Knıazıa Shýskıe» degen taqyryptaǵy maqalasynda. «Bul ımportalmastyrý saıasaty aıasynda óte jaqsy bolar edi. Óıtkeni, bizde keńse qaǵazdarynyń ımportyna jylyna 100 mln. dollar shyǵyndalady», - deıdi Ulttyq kásipkerler palatasynyń ókili Batyrbek Áýbákirov.
Basylymnyń atap ótýinshe, ondaı qaǵazdy shyǵarý úshin tehnıkalyq sora qajet. Degenmen, dál osy sátte problema týyndaıdy. Óıtkeni, zańǵa sáıkes marıhýananyń barlyq sorty esirtki sanalady.